Семей өңірлік онкологиялық диспансер дәрігерлері үшін де ерекше маңызға ие болды. Атап айтсақ, Халықаралық ядролық сынақтарға қарсы іс – қимыл күні саналатын 29 тамыз қарсаңында шаһарымызға Жапониядан арнайы өкілдер келген болатын. Олардың арасында ядролық сынақ зардабын тартушылар денсаулығын зерттеумен әрі оларды оңалту бағытындағы шаралармен айналысатын бір топ өкілдер өңірлік онкологиялық диспансерде болып, қызмет барысымен танысты.
Мәртебелі меймандар ең алдымен онкологиялық диспансердің күндізгі стационар бөлімінде болып, ондағы емдеу және диагностикалаудың соны әдіс-тәсілдерімен танысты. Мұндағы жаңадан алынған заманауи құрылғылар қатерлі ісік түрлерімен күресте мамандар қызметіне тың серпін береді. Атап айтсақ, цитологиялық зертхана мен патоморфологиялық бөлімде болып, дәрігерлер қауымымен тілдескен жапондық меймандар мұндағы қолға алынған қарқынды емдеу түрлеріне және жаңа құрыл- ғылар жұмысына жоғары баға беретіндіктерін жеткізді. Қонақтарды бастап жүрген өңірлік онкологиялық диспансер директоры Марат Сандыбаев әр бөлімнің қызметімен де таныстырды. Ал меймандар жағы мұқият тыңдап, сауалдарын да қойып отырды.
{jcomments on}- Шынын айтсам, Семейдегі онкологиялық диспансер жұмысының жоғары деңгейде екенін көріп таңырқадық. Мен ең алғаш Семейде 1995 жылы, содан соң 2000 — жылдары болғанмын. Кейінгі жылдары да бірнеше рет келіп, сіздердегі медицина саласының өркендеуіне куә болып жүрдім. Бірақ қазіргі күні жетістіктің анағұрлым жоғары екеніне көзім жетті. Сонымен қатар Жапония тарапынан аталмыш диспансерге 2010-шы жылдары сыйға тартылған құрал-жабдықтардың да әлі күнге дейін халыққа қалт-қысыз жұмыс істеп тұрғанын, мамандардың оны жетік меңгергендерін көрдік. Мен сіздердің онкологиялық диспансерлеріңіз күллі Қазақстан бойынша бірінші орында тұрған мекеме екеніне сенімдімін. Біздің бүгінгі мақсатымыз 29 тамыз күнгі өтетін іргелі шараларға қатысу болатын. Соның аясында Семей медициналық университетінде өтетін ғылыми конференцияда арнайы баяндама жасап, семейлік әріптестерімізбен тәжірибе алмасу еді. Сапарымызды онкологиялық диспансерден бастауымыздың бір себебі — өңірлеріңіздегі қатерлі ісікпен күрестегі сіздердің қол жеткізген жетістіктеріңізбен танысу, — дейді Нагасаки университетінің вице-президенті, профессор, радиацияның адам денсаулығына әсерін зерттеп жүрген ғалым Суничи Ямашита.
Жапондық ғалымдар өңірлік онкологиялық диспансерде ұзағырақ аялдады. Әсіресе диагностикалау ісінде семейлік дәрігерлердің жапондық медицина саласы мамандарының жетістіктеріне ілесе алатындай әлеуеті бар екендіктерін мойындады. Меймандар осыдан соң қалалық әкімдікке келді.
Қалалық әкімдікте өткен басқосуда Жапонияның Нагасаки префектурасы мен Семей әкімдігі арасында білім, ғылым, медицина саласындағы өзара әріптестік әрі ынтымақтастық байланысты нығайту мақсатында екі жақты меморандумға қол қойылды. Айтулы шараға қала әкімі Ермак Сәлімов, ШҚО Денсаулық сақтау басқармасы басшысының Семей өңірі бойынша орынбасары Ғалия Жуасбаева, «Республикалық медициналық палата» ҚБ-нің бас директоры Мақсұт Құлжанов, Нагасаки дәрігерлері Ассоциациясының президенті Ясуиеши Макимото, Нагасаки университетінің вице-президенті Суничи Ямашито және өзге де медицина саласының жетекшілері қатысты.
Меморандумға сәйкес, қос тарап, медицина, денсаулық сақтау және әлеуметтік қамсыздандыру жөніндегі тың ақпараттармен бөлісуді көздеуде. Сондай-ақ біліктілікті арттыру мақсатында, екі елдің ақ халаттылары өзара тәжірибе алмасатын болады. Бұдан өзге құжатқа сәйкес, бірлескен жобалар әзірленіп, медицина кластерін дамыту үшін ғылыми конференциялар, семинарлар мен шеберлік сағаттары өткізіледі деп жоспарлануда. Нагасаки дәрігерлері Ассоциациясының президенті Ясуиеши Макимото әлеуметтік маңызы зор келісімнің нәтижесінде қос өңірдің ықпалдастығы өркендей түсетініне сенім білдірді.
– ШҚО – ның Денсаулық сақтау басқармасымен әріптестік орнатқанымызға біршама уақыт болды. Тарихтан Хиросима мен Нагасаки қалалары атом жарылысынан жапа шеккені мәлім. 2017 жылы Қазақстанда міндетті медициналық сақтандыру жүйесі енгізіліп, медициналық мекемелер автономизацияланатыны белгілі. Бұл екі бағыт бойынша біздің елдің әжептәуір тәжірибесі бар. Осы орайда біз сіздермен аталмыш салада бар білгенімізбен бөліскіміз келеді. Қазақстанның денсаулық сақтау реформасына аз да болса пайдамызды тигізсек дейміз. Біз әрі қарай да ШҚО-мен тығыз қарым – қатынаста жұмыс істей беруге әзірміз,- деді өз сөзінде Ясуиеши Макимото мырза.
Өз кезегінде ШҚО Денсаулық сақтау басқармасы басшысының Семей өңірі бойынша орынбасары Ғалия Жуасбаева Семей қаласын медициналық кластерге айналдыру мақсатында көлемді жұмыстар атқарылып жатқанын баяндай келе, жапондық дәрігерлердің қатысуымен жүзеге асырылған жемісті жобаларды да атап өтті. – Семейде медицина саласы қарқынды даму үстінде. Оған дәлел ретінде өткен және ағымдағы жылдары пайдалануға берілген бірнеше нысандарды айтуға болады. Болашақта қаламызда медициналық кластер әрі медициналық туризм қалыптаспақ. Біздің Жапон үкіметімен арадағы қарым-қатынастың тарихи тамыры бар. Сіздермен орнаған ұзақ мерзімді байланыстың нәтижесінде ел тұрғындарына сапалы медициналық қызмет көрсетуде бірқатар ауқымды шаралар жүргізілді. Осында отырған қаламыздың дәрігерлер қауымы бүгінгі кездесуден кейін екі тараптың денсаулық сақтау саласындағы ықпалдастығы беки түсетініне сеніммен қарайды және жаңа серпіліс береді деген үмітте, — деді Ғалия Абдуғалиқызы.
«Республикалық медициналық палата» ҚБ-нің ШҚО филиалының директоры Р.Енсебаев пен Нагасаки дәрігерлері Ассоциациясының президенті Ясуиеши Макимото өзара өңірлік әріптестікті бекітетін меморандумға салтанатты түрде қол қойды.
Ресми шарадан кейін қала әкімі Ермак Сәлімов қол қойылған меморандумнан соң екі елдің қос өңірі арасындағы ынтымақтастықтың екінші тынысы ашылатынына зор үмітпен қарайтынын жеткізді. Кездесу соңында Ермак Бидахметұлы Күншығыс елінің өкілдеріне естелікке Түйемойнақ аралындағы «Бейбітшілік стелласының» шағын көшірмесін тарту етті. Өз кезегінде жапондық ақ халаттылар да қала әкіміне «Бейбітшілік қоңырауын» сыйға тартты.
Қуаныш ЖОЛЫМБЕТ,
Жақсылық МҰРАТҚАЛИ,
«Семей таңы».
