Апта сәрсенбісінде Семей қаласының жұмыспен қамту және әлеуметтік бағдарламалар бөлімі мемлекеттік мекемесінде БАҚ өкілдері үшін баспасөз мәслихаты ұйымдастырылды. Қозғалған негізгі тақырып – тым ауқымды болды. Атап айтқанда, «Қазақстан Республикасының мүгедектерді әлеуметтік тұрғыдан қорғау Заңын жүзеге асыру» аясындағы атқарылып жатқан шаралар қатары мен түйінді мәселелер сөз болды.
{jcomments on}Жиынды аталмыш мекеме басшысы міндетін атқарушы Азамат Құрманғалиев алғысөзбен ашты. Бүгінгі таңда қоғамның әлжуаз мүшелерін, оның ішінде түрлі топтағы мүгедектерді әлеуметтік тұрғыдан қорғауға алу шаралары жөніндегі ел Үкіметінің алға қойып отырған бірқатар мәселелерімен аталмыш тараптағы Заң талаптары жайлы сөз қозғаған Азамат Аманкелдіұлы соңғы кезеңдері орын алған өзгерістер жайында тұщымды мағлұмат беріп өтті. Мысалы, өздігінен қозғалуы қиындық тудыратын мүгедектер үшін жеке көмекші бөлу ісінде біршама өзгерістер бар. Сонымен қатар аталмыш заңның 754-бабы алынып тасталып, оның орнына мүмкіндігі шектеулі жандарды әлеуметтік қамту тұрғысындағы 26 бап күшіне енген.
Жалпы, бүгінде жалғызілікті мүгедек жандар толықтай мемлекеттің қамқорлығына алынған. Олар үшін Семей қаласында 16 жеке көмекші қызмет етеді. Алайда, қызмет көрсету тым ауқымды. Себебі бұл қызметкерлер шаһарымызда тұратын өздігінен жүріп-тұруы қиын 83 адамға үлгеруі тиіс көрінеді. Міне, осы тараптан кейбір тұрғындар арасында шамалы түсінбестік туындауда. Атап айтсақ, 1-ші немесе 2-ші топтағы мүгедектердің туыстары мүгедектерді қамқорлықтарына алғандары үшін жәрдемақы беруді сұрайды. Алайда бұл қисынсыз. Себебі қабылданған Заң бойынша жасы 18-ден асқан мүгедекке көрсетілетін қамқорлық үшін мұндай ақы түрі төленбейді. Оның есесіне мүмкіндігі шектеулі жанға қажетті көмекті мемлекет өзі көрсетеді. Мәселен, арбаға таңылған мүгедектер үшін инватакси қызмет көрсетсе, өзге тұлғалардың үйлеріне жеке көмекші жіберіледі. Бұдан өзге де жәрдем түрлері көп. Ал қартайған ата-аналары үшін перзенттері көмек жасаулары тиіс. Бұл тіпті Ата Заңда атап көрсетілген. Алайда, өкінішке орай, әке-шешесін қартайған шақта тастап кетіп, өздері бақуатты тұрып жатқан азаматтар бар. Олардың әке-шешелеріне де мемлекет қамқорлық жасайды.
Жиын барысында мекеме басшылығына журналистер тарапынан сауалдар да қойылды. Мәселен, жеке көмекші қызметін атқаруға қызығушылық білдіргендерге қойылатын талап туралы сұраққа Азамат Аманкелдіұлы:
— Ынта білдірген, қолынан жұмыс істеу келетін кез келген азамат аталмыш қызметке тұра алады. Олардан жоғары білім талап етілмейді. Мүгедектердің туыстары тарапынан мұндай ұсыныстар болған. Алайда аталмыш қызметке тұрған жағдайда оларға тек өзінің мүмкіндігі шектеулі туысына ғана емес, қаламыздағы тіркеуде тұрған өзге 83 мүгедек жанға, алдын ала түскен өтініштері бойынша барып, көмек көрсетуі тиіс болатынын түсіндірдік, — деп атап өтті.
Қуаныш ЖОЛЫМБЕТ,
«Семей таңы»
