Бүгінде Зайсан орман шаруашылығы қала, ауыл әкімдерімен ынтымақтаса жұмыс істеп, аудандағы елді мекендердің, мекемелер аулаларының, саябақтар мен көше бойларының көркеюіне, көгалдануына, абаттануына жәрдем көрсетіп, көңіл бөледі. Бұл тарапта ауданымыздағы мекемелерге жыл сайын 2-3 мың түп түрлі ағаш көшеттері тегін беріліп келеді.
Қазіргі таңда ауданымызда «Жасыл ел», «Жасыл даму», «Жасыл жапырақ», «Жасыл желек» бағдарламаларын іске асыруда көптеген жұмыстар атқарылуда.
Бұл мекеменің тарихы терең, атап айтқанда 1875 жылдан бастап Зайсан қаласы уездің саяси әкімшілік орталығы болуына байланысты 1876 жылдан бастап орман-тоғай мекемесі болып құрылған. Со-дан бері атауы бірнеше рет өзгергенімен, негізгі мақсаты — қоршаған ортаны көздің қарашығындай қорғау екені белгілі.
Орман шаруашылығы мемлекеттік мекемесіне 88813 гектар жер бекітіліген. Негізгі ағаш қоры Сауыр, Сайқан таулары мен Қара Ертіс өзенінің жағалауына орналасқан. Зайсан ауданындағы орманды ал-қаптар 1956 жылдан бастап 1988 жылдың тамыз айы аралығында бірнеше рет тік ұшақпен жоғарыдан суретке түсіріліп, карта-схемасы жасалып анықталып, тексерілген. Зайсан орман шаруашылығы «Зайсан» және «Қаратал» орманшылығына бөлінеді. Қабырғатал-Көртерек құмдарындағы шырғанақтың бірнеше түрі (сорты) өсетін 1300 гектар жер табиғи қорыққа айналдырылған. Бұл құм Шығыс Қазақстандағы ең аумағы үлкен шырғанақ өсетін өңір, теңіз деңгейінен 480-520 метр биіктікте жатыр.
Сол сияқты Кендірлік өзені бойындағы (Қарашоқы) 557 гектар алқап қорғауға алынған. Шырғанақ, долана, итмұрын, итсигек, мо-йыл, шәңгіш, көкбояу, алтын тамыр, марал тамыр тағы басқа өсімдіктер, жеміс-жидек, саңырауқұлаққа бай. Қазақстанның басқа өңірінде кездеспейтін «Зайсан сексеуілі», «Сауыр сүмелегі» деп аталатын өсімдіктер осы алқапта өседі. Осы жерге жергілікті аң-құстан басқа қырғауыл (фазан) жіберілді. Заман талабына сай жабдықтал-ған әсем «Бәйтерек» сауықтыру демалыс орны да осы жерде. Зайсан таулары орманға, емдік қасиеті бар өсімдіктерге бай өлке. Негізгі өсетін ағаш-бұталар: шайырлы қарағай, ақтерек, көктерек, қайың, тал, үйеңкі, қарағаш, шеңгел, сексеуіл, дүзген, үшқат, тошала, то-былғы. Зайсан орманшылығының «Шүршітсу» бөлімшесіндегі тұқымбақта әр түрлі орман ағаштары отырғызылып, күтіліп бапталуда.
Өткен жылы 0,1 гектар сібір қарағайының тұқымы себіліп өсірілуде. Орманды молайту мақсатында «Жирентай» бөлімшесінде 25 гектар жерге сібір қарағайының көшеті отырғызылды. Қорыта айтқанда атқарылып жатқан жұмыстар ауқымды. Ең бастысы «ынтымақ бар жерде, ырыс бар» дейді халық даналығы Зайсан орман шаруашылығы мемлекеттік мекемесінің директоры Қыдырбек Ахметов ұжым мүшелерінің береке-бірлігін нығайта білген. Мекемедегі 54 қызметкерге арнайы форма берілген. Барлық жетекші мамандар жоғары, арнайы білімді және заман талабына сай сертификаттар алып, қысқа мерзімдегі біліктілікті арттыру курстарынан білімдерін жетілдірген. Орманшылар Болат Омаров, Жанболат Тоқтарбаев, Кенжехан Далабаев, Жұмажан Байгозин, Абуғабдыл Көпбергенов, Қанат Алипанов, Жетпісбай Төлесовтер келешекте де табысты еңбек етіп, ел байлығын өрттен, заңсыз шауып, қырқудан қорғап, орман қорын молайту, табиғи өсуіне өз үлестерін қосатынына сенім зор.
Қалибек АЛТЫБАЙ, «Семей таңы»
