Кеше Семей қалалық әкімдігінде мемлекеттік қызметшілер үшін аппараттық сабақ болып өтті. Қала әкімінің орынбасары Жағыпарбек Елубаев, қалалық мәслихаттың төрағасы Бейсенбек Ақжалов қатысқан жиынға әкімдіктегі бөлім қызметкерлері, БАҚ өкілдері жиналды.
Бұл жолғы дәріс салық қызметі және оған енгізілген өзгерістер мен өзге де әлеуметтік төлемдер туралы өтті. Көпшілік алдында Семей қалалық салық басқармасының басшысы Қанат Әділбаев кең көлемді танымдық баяндама жасады. Ең алдымен ҚР Заңнамасындағы «Салық және өзге де міндеттелген бюджеттік түсімдер» кодексінің тармақтары мен салық жүйесінің құрылымдары, салық түрлері туралы түсінік беріп өтті. Салық басқармасының басшысы, сонымен қатар, ел аумағындағы салық төлемінің ерекшеліктері, төлемдерді жинау мәселесі төңірегінде де толыққанды ақпараттандырды. Бүгінгі таңда Қазақстан Республикасында салықтың 13 түрі қолданыста бар. Ал осыған байланысты ел азаматтарының өзіндік міндеттері мен құқықтары белгіленген. Бұл жайында Қ.Әділбаев салық төлеушіге қойылатын талаптар мен салық алдында борышкер болған жағдайдағы құқықтары жайлы баяндады.
Осыдан соң салық басқармасының басшысы республика азаматтары үшін міндетті болып табылатын салық түрлеріне жекелей тоқталды. Атап айтсақ, көлік салығы, жер салығы, сонымен қатар, арнайы салық режимі жүйесі туралы тың мәліметтермен бөлісті. Бұл орайда баяндамашы 2014 жылдың 1 қаңтарынан бастап еліміздің Салық туралы Заңнамасындағы жаңа өзгертулер мен толықтыруларға баса тоқталды. Бұл орайда ел Парламенті қозғалтқышының ауқымы үлкен, шетелдік автокөліктер үшін төленетін салықтың көлемін ұлғайту туралы шешім қабылдаған болатын. Ал жер салығына байланысты өзгерістер белгілі мақсатқа пайдаланылмай бос жатқан жер телімдеріне байланысты енгізілген. Яғни, тұрғын үй немесе құрылыс нысандарын салуға арналған мұндай жер аумағы үшін салынатын салық көлемі артатын болады. Бұл шешім — сатып алынған, алайда ұзақ уақыт қолданыссыз жатқан немесе құрылысы тоқтап қалған жер телімдері иелері үшін ой салары анық.
Қ.Әділбаев айтып өткендей, мұндай жерлерді инвентаризациялау бағытында арнайы комиссия жұмыс істейді. Сондай-ақ, енгізілген өзгерістерге байланысты арнайы салық режимі бо-йынша жұмыс істейтін жеке кәсіпкерлерден төлем алынбайтын болды. Жеке тұлағалардың салық мәселесіне орай енгізілген жаңалықтар тек салықтың осы түріне байланысты базалық ставкалары жоғары Астана мен Алматы қалаларын және облыс орталықтарын ғана қамтиды.
Осыдан соң, Қанат Әділбаев фермерлер мен шаруа қожалықтарына арналған салық режимі жайлы айтып өтті. Сонымен қатар, алкогольдік тауар түрлері және темекі өнімдерінің акциздік ставкаларының жоғарылауы жайлы да тұщымды мағлұматтармен бөлісті. Бұл шараларды қабылдаудағы бір мақсат — тұрғындар үшін әлеуметтік зияндылығы жоғары тауар түрлерін шектеуге бағытталған.
Сөзінің соңында салық басқармасының басшысы қатысушылар сауалдарына жауап берді. Заңды тұлғалардан тұтынылған жылу энергиясының қарызын өндіріп алу жайлы сұраққа Қ.Әділбаев бұл орайдағы салық қызметкерлерінің міндетін түсіндіріп өтті. Мәселені инкассалық нұсқау қабылдау арқылы, яғни, қарыз мекемеге түсетін кірістің бір бөлігін «Теплокоммунэнерго» МКК алдындағы дебиторлық қарызды өтеу үшін өндіріп алу арқылы шешуге болады.
Сондай-ақ, Қанат Әділбаев мемлекеттік қызметшілер декларациясына байланысты өзгерістер жайлы да айтып өтті. Ендігі арада декларацияда зейнеткерлік аударылымдар мен дивиденттер көрсетілмейтін болады. Сонымен қатар, жер учаскесінің кадастрлық нөмірі мен көліктің VIN-коды, егер бұлар бар болған жағдайда, көрсетілуі міндетті.
Жиынның соңында Семей қалалық салық басқармасының басшысы қатысушыларға назар қойып тыңдағандары үшін алғыс білдірді. Және де алдағы уақытта еліміздегі салық Заңнамасына енгізілген өзгерістер жайлы кеңінен мағлұмат беретін семинар-кеңес өткізілетінін айтып өтті.
Өз кезегінде қорытынды сөз алған қала әкімінің орынбасары Жағыпарбек Елубаев Қанат Әділбаевқа танымдық баяндамасы үшін алғыс айтты. Қала әкімінің орынбасары, сонымен қатар, салық жинау қала өмірі үшін маңызды сала екендігін, сол себепті бұл қызметтің сапасын жоғарылатып, жиналатын салық өсімін арттыру қажет екендігін де тілге тиек етіп өтті.
Қуаныш ЖОЛЫМБЕТ,
«Семей таңы»
