Дүниежүзілік қатерлі ісікке қарсы күрес күні жыл сайын 4 ақпанда аталады. Бұл күнді Қатерлі ісікке қарсы халықаралық одақ (UICC) белгілепті. Мақсаты – Жер шары тұрғындарына рак туралы мағлұмат беру, оны уақтылы анықтап, емдеу және алдын алу. Осы мақсатта 4 ақпан күні онколог дәрігерлер Семей өңірлік онкологиялық диспансерінде баспасөз мәслихатын өткізді. Баспасөз мәслихатының басты мақсаты — БАҚ өкілдерінің көмегімен, адамдардың назарын қатерлі ісікпен күреске аудару, олардың алдын ала тексерілуге деген құлшыныстарын арттыру. Яғни, дерттің алғашқы белгілерін күтіп жүргенше, дәрігерге барып, рак қаупінен сақтанудың жолдарын қарастыруды қолға алу.
Ресми деректерге сүйенсек, Семей өңірінде обыр дертіне шалдығу деңгейі жоғары. Жыл сайын аты жаман ауруға шалдығатындар саны мың жарым адамға дейін жетеді екен. Өкініштісі сол, ауру жасарып барады. Сондықтан дәрігерлер науқасты ерте кезеңде анықтауға мүмкіндік беретін тексерулердің маңызды екенін айтады. Биылғы жылы қауіпті кеселге қарсы күрес «Біздің қолымыздан келеді! Менің қолымнан келеді» атты ұранмен өтуде. Семей өңірлік онкологиялық диспансері директорының ұйымдастыру және әдістемелік жұмыстары бойынша орынбасары Нұргүл Жұмықбаева Қазақ онкология және радиология ғылыми — зерттеу институтының (Қаз ОРҒЗИ) өткен жылғы сараптамасына сәйкес, жылда ел көлемінде қатерлі дертпен науқастанған адамдардың саны 30 мыңнан асатынын мәлім етті.
— Елімізде тұрғындардың онкологиялық дертке шалдығуы бойынша ШҚО 2-ші орында. 2015 жылы Семейдегі аурушаңдық көрсеткіші облыста алдыңғы қатарға шыққан. Олардың арасынан өкпе, омырау безі, асқазан, жатыр мойны рагі көш бастап тұр. Онкодиспансердің негізгі міндеті – обыр дертінен болатын өлім көрсеткішін азайту. Мәселен, өткен жылы Семей өңірінде 1 576 адам тіркеуге алынды. Анықталғандай, олардың 66 пайызы Семей қаласының тұрғындары. Осыдан 10 жыл бұрынғымен салыстырғанда, өлім деңгейі 20%-ға азайған. Бұл — скринингтік және алдын алу жұмыстарының нәтижесі. Осы мақсатта 2012 жылы, Мемлекет басшысының тапсырмасына сәйкес, «ҚР Онкологиялық көмекті дамыту туралы» салалық бағдарлама қабылданған болатын. Бағдарлама негізінде біз скринингтік зерттеулерді жетілдіруге мүмкіндік алдық. Соңғы үш жыл ішінде 300 мыңнан астам адам тексеруден өтті. Олардың 3%-да обырдың 1-2 сатысы табылып отыр. Сондай –ақ 10 мыңнан астам адамның осы дертке ұшырау қаупі дер кезінде анықталды. Бүгінгі уақытта олар қажетті емдеу шараларын алуда, — дейді Нұргүл Жұмықбаева.
Баспасөз мәслихатында онкодиспансер жетістіктері туралы да айтылды. Онкология және визуалды диагностика кафедрасының меңгерушісі Тасболат Әділхановтың айтуынша, бұрын науқастар емделу үшін шетелге баратын. Бүгінде мұнда заманауи емдеу әдістері кеңінен қолданыла бастады.
— Қазір біз химиоэмболизация технологиясын қолға алдық. Бұл жүрек-қан тамырларын стенттеу процедурасына ұқсас деуге болады. Мәселен, адамның қан тамырлары арқылы қажетті дәрі жіберіледі. Ол ағзадағы қатерлі жасушаларды жоюға ықпал етеді. Осылайша, біз отаға жүгінбей-ақ науқасты емдеуге мүмкіндік аламыз, — дейді Тасболат Алпысбесұлы.
Баспасөз мәслихатында бірқатар мәселелер де ортаға салынды. Әсіресе тұрғындар ортасында обыр дерті жайындағы қажетті ақпараттың мардымсыздығы баса айтылды. Семей өңірлік онкологиялық диспансерінің директоры Марат Сандыбаевтың айтуынша, қазір осы олқылықты ескере отырып, ішкі аудит бойынша директордың орынбасары қызметі тағайындалыпты. Аталмыш лауазымдағы маман тікелей емделушілердің арыз-шағымдары және қызмет көрсету сапасы сияқты бірқатар істермен шұғылданатын болады.
Жақсылық МҰРАТҚАЛИҰЛЫ,
«Семей таңы»
