№37 гимназияда Шешендік сөз өнері орталығы ашылды. Инновациялық орталықтың ашылуына халықаралық «Қазақ тілі» қоғамы мен Қазақ инновациялық гуманитарлық-заң университеті бастамашы болған. Орталыққа белгілі қоғам қайраткері, қазақ тілінің жанашыры Бәтташ Сыдықұлының аты берілді. Бәтташ Сыдықұлы Тәуелсіздіктің алғашқы жылдары қалада мемлекеттік тілде тәрбие беретін бірнеше мекемелердің ашылуына тікелей мұрындық болған.
Бәтташ Сыдықұлының бастамасымен 1990 жылы Семей облыстық «Қазақ тілі» қоғамының іргетасы қаланады. Нәтижесінде Семей қаласындағы қазақ мектептерінің санын екіден жетіге, жалғыз қазақ балабақшасын 17-ге жеткізуге күш салады. Әсіресе қаланың дәл ортасынан №37 қазақ мектебін ашуға мұрындық болды. Мектепте 15 бірінші сынып ашылады. Қазір Семейдегі №37 гимназия — іргелі оқу орындарының бірі. Шара барысында алғашқы мерекелік құттықтау сөз «Құрмет» орденінің иегері, аталмыш гимназияның директоры Жұмағазы Стамбековке берілді. Ол игі шараға қатысушыларға орталықтың ашылғанына қуанышты екенін жеткізіп, ардақты азамат Бәтташ Сыдықұлының елеулі еңбегіне тоқталды.
— Білім ошағы Бәтташ Сыдықұлы армандаған ойларын жүзеге асырды деп айтуымызға болады. Бүгінге дейін мектебіміздің 61 оқушысы «Алтын белгі» төсбелгісіне ие болды. Мұндай көрсеткішке Семей өңірінің бірде-бір мектебі жете қойған жоқ. Он бес шақты оқушымыз «Болашақ» бағдарламасы бойынша білім алды. Үш оқушымыз — ғылым кандидаттары. Міне, сондықтан Бәтташ ағамыздың ойлаған арманын жүзеге асырдық деп есептейміз. Ал біз Бәтташ Сыдықұлын мәңгі есте қалдыру мақсатында осы мектепте Шешендік сөз өнері орталығын аштық, — дейді Жұмағазы Стамбеков.
Келесі кезекте сөз алған профессор, қоғам қайраткері Арап Еспенбетов аталмыш шараның маңыздылығына жан – жақты тоқталды.
— Бүгінгі шараны ұстазға, қазақ тіліне деген үлкен құрмет деп білуіміз керек. Мен Бәтташ Сыдықұлының оқушыларының бірімін. Бәтташ аға, шын мәнінде, ұстаз дейтін бір ғана сөзге сыя қоймайтын үлкен қайраткер, шешен адам. Ол кісі жаңашыл болды. Біз сонау 50-ші жылдары мектепте оқып жүргенде, Семей өңірінің шұрайлы Саржал ауылында мектептің радиоторабын ашты. Бұл үлкен жаңалық болып, газетке жазылды. Аты мектептікі болғанымен, ол бүкіл ауылдың радиоторабы еді. Әуелі мектептің, одан кейін ауылдың жаңалықтары айтылып, ән шырқалып, күй төгілетін. Бәтташ аға әдебиетке ерекше бейімі бар адам еді. Жұмысқа келе сала жазуға ебі бар жастарды жинақтап алып, альманах ашты. Бірінші өлеңін өзі жазды, қалғанын шәкірттеріне тапсырып, зерек жастардың қаламға үйір болуына жағдай жасады. Көптеген қаламгерлердің төселуіне, алғашқы өлеңдері мен әңгімелерінің жазылуына ықпалын тигізген Бәтташ ұстазымыз еді, — деді А.Еспенбетов.
Салтанатты жиында Семей қаласы әкімінің орынбасары Надежда Шарова да сөз алып, қала әкімшілігі атынан шараға қатысушыларды құттықтады.
— Бүгін қаламызда айтулы оқиға орын алып отыр. Еліміз 25 жыл тұрақтылық пен татулықта, бірлік пен берекеде ғұмыр кешіп келеді. Бүгінгі Шешендік сөз өнері орталығының ашылуы — біздің береке-бірлікте атқарып жатқан көптеген мәдени шараларымыздың бірі, — деді қала әкімінің орынбасары.
Салтанатты шарада гимназияның Жас қаламгерлер клубының мүшелері ұлағатты ұстаздың өмірдеректерінен сыр шертті, Бәтташ Сыдықұлына арнаған арнауларын оқыды. Осыдан кейін Шешендік сөз өнері орталығының лента қию рәсімі өткізіліп, бұл мәртебелі құрмет Бәтташ Сыдықұлының жұбайы Үміт Өмірбекқызы мен №37 гимназия директоры Жұмағазы Стамбековке берілді.
Жалпы, орталық шешендік сөз өнерінің қыр-сырын, жыраулар мен билердің дана сөздерін, сонымен қатар әділ шешімдерін жан-жақты дәріптеуді көздеп отыр. Бұл бағытта Қазақ инновациялық гуманитарлық — заң университеті мен №37 гимназия басшылығы бірлесе жұмыс атқару үшін ынтымақтастық меморандумына қол қойды.
Асан МЫРЗАХАН,
«Семей таңы»
