Шығыс Қазақстан облысының әкімі Даниал Ахметов облыста сүт-тауарлы фермаларын жандандыру жұмысын тапсырғаны белгілі. Бүгінде облыс әкімінің тапсырмасы аясында жармалықтар аудан тұрғындарын сүтпен қамтамасыз ету бағытындағы жұмыстарды бір жүйеге негіздеуде.
Мал басына қайта есеп жүргізіліп, бағдарламаға қатысуға ниет білдіруші шағын жеке шаруа иелері анықталып, сүт қабылдау нүктелері, өңдеуші кәсіпорындар құрамы нақтыланып, аймақ басшысының бастамасы осылайша жан – жақты пысықталып барып қолға алынды. Аталған жұмыс, әлбетте, жүйелілікті қажет етеді. Алғашында сүт қабылдау пункттері ашылған еді. Тұрғындардан қабылданған сүт өнімі әрі қарай зауытқа жеткізіледі. Бүгінгі таңда маусымдық жұмысқа төрт бірдей сүт қабылдау пункті толыққанды дайын.
Ендігі кезекте шаруашылық құрылымдары сүт фермаларын ашуға қызығушылық танытып, бүгінде нақты жобалар жүзеге асу үстінде. Қалбатау ауылдық округінде «Сүлеймен» шаруа қожалығының басшысы Гүлнұр Атабаева сүт фермасын ашуға кірісіп те кеткен. Қазіргі таңда шаруашылық өз қаражатына Ресейден 50 бас сүтті құнажын сатып алған. Шаруа қожалығы иесінің талпынысына қарап сүт өндіру ісі Жарма ауданында бір жолға қойылатын уақыт алыс еместігін аңғаруға болады. Таяуда аудан әкімі Нұрлан Сыдықов шаруа қожалығына арнайы жұмыс сапарымен барып, сүт өндіру орнының тыныс – тіршілігімен танысты. Аудан әкімі шаруашылықтың сүт өндірісіне деген бастамасына жергілікті атқарушы билік тарапынан қашанда қолдау болатынын жеткізді. Қожалық басшысы Гүлнұр Атабаева Ресейден әкелінген сүтті ірі қаралардың төлдегенін айта келе, Ортабұлақ ауылында орналасқан шаруашылық сонымен қатар мал басын өсіруге де мән беріп отырғанын жеткізді. Аудан әкімі Нұрлан Бәтташұлы осы ретте өзінің де бірқатар ұсыныстарын ортаға салды. Мал басын орналастыруға және саууға қолайлы, заман талабына сай мал қораларын салу жөніндегі ойын жеткізді. Сонымен бірге ауданда өндірілетін сүт өнімдерін қалаларға тасымалдау көп шығын туғызатындықтан, аудан орталығында сүт өндіру орнын ашу жағын да ескеру керектігін айтты. Сүт өндіре отырып, оны өңдеуден ұтарымыз көп екенін ерекше атап өткен аудан басшысы сүт өнімдерін өндіретін орын арқылы ауданның ішкі сұранысын сапалы өніммен қамтамасыз етуге болатынына нақты мысалдар келтірді.
Мейірхан ОСПАНБАЕВ,
“Семей таңы”
