«Нұр Отан» партиясының Семей қалалық филиалының қоғамдық қабылдау бөлмесінде қала әкімінің орынбасары Зәуреш Исабаева азаматтарды жеке сұрақтары бойынша қабылдады. Бұл күні қоғамдық қабылдауға тіркелген тұрғындар саны 18 адамды құрады.
Бұл аталмыш филиалдағы жыл басынан бері екінші рет өткізіліп отырған шара. Соңғы кездері қоғамдық қабылдауға жазылушылардың саны артып келе жатыр. Жергілікті тұрғындардың «Нұр Отан» партия-сына деген сенімінің нығайғандығының белгісі болса керек-ті, бұл жолы да қала әкімі орынбасарының алдына қойылған сауалдардың басым көпшілігі әлеуметтік мәселелерді қамтыды. Қоғамдық қабылдауға сонымен қатар, қалалық ТҮКШ бөлімі басшысының міндетін атқарушы Сабыр Әшелов, қалалық құрылыс бөлімінің сектор меңгерушісі Назым Жанболатова, білім бөлімі басшысының орынбасары Наталья Фесенко сынды құзырлы орындар өкілдері қатысты.
Қабылдауға алдымен кірген Юность кентінің тұрғыны Г. есімді көп балалы ана екі мәселе бойынша келіпті. Алдымен мемлекет тарапынан әлеуметтік көмек көрсетуді сұраса, екінші мәселе бойынша 2000 жылдан бастап тұрып келе жатқан үйін заңды тұрғыда өз атына шығаруға көмектесуді өтінді. Бұл мәселемен толық танысқан қабылдауға қатысушы мамандар аталмыш мәселенің айтарлықтай ауыртпалығы жоқ екендігін айта келе, шешімінің жолдарын түсіндірді.
{jcomments on}Ал А.Егорқызының мәселесі мүлде бөлек. Өзінің айтуынша Семей мемлекеттік медицина университетінде интернде білім алып жүрген ұлын Павлодар қаласына жіберген. Арызданушы азаматша осы ұлын денсаулығына байланысты тәжірибесін Семей қаласында өткеруге көмек көрсетуді сұрап келіпті. Қала әкімінің орынбасары сол мезет аталмыш оқу орнының басшылығына телефон шалып, мәселенің мән-жайына қанықты. Нәтижесінде, оқу орнының ректораты көмектесетіндіктерін айтты.
Қабылдауға келген байырғы ұстаз Ұлбар Сәрсенбинаның ұсынысы мемлекеттік тілді дамытуға арналыпты. Өзін жоғары білімді педагогпын деп таныстырған азаматша оқушылар мен студенттердің жазу мәдениетін қалыптастыруда тың жоба әзірлегенін, соны білім ордаларының оқытушыларымен бірігіп іске асыруды көздейтінін жеткізді. Алайда, бірқатар әкімдік бөлімдеріне, тіпті мектептердің өздеріне барғанымен нәтиже болмапты. Зәуреш Рамазанқызы азаматшаның жобасы жазылған екі беттік қағазын қарап шығып, қатысып отырған білім бөлімі басшысының орынбасары Н.Фесенкоға оның ұсынысы бойынша қандай жұмыстар атқаруға болатынын сұрады. Ал бөлім басшысының орынбасары өзіне жеке қабылдауға келуін және бұл мәселені бірігіп талқылауды ұсынды.
Қабылдауға жазылған Владислав есімді азамат екінші топтағы мүгедек екендігін айтып, білім алуға көмек көрсетулерін сұрады. Себебі, жұмыс істеу үшін арнайы сертификат немесе диплом керек. Ауыр жұмыстар атқаруға денсаулығы жарамайтынын айтқан азаматқа алдағы уақытта қаламыздағы оқу орындарының бірінен арнайы мамандық алуға көмек көрсетілетін болды. Ал содан кейін жұмысқа орналастыру мәселесі қарастырылмақ. Бұл жайтты Зәуреш Исабаева өз қадағалауында ұстайтындығын айтып, уәде етті.
Ал қала тұрғыны, 11 баласы бар ана Бибігүл апайдың айтары көп болды. Қоғамдық қабылдаудағы осы мүмкіндікті пайдаланып, қаладағы көлік тасымалына байланысты өз ұсыныс-тілектерін жеткізе кетті. Атап айтсақ, қала ішіндегі автобустар мен бағытты таксилердің жүргізушілері мен кондукторлары бірыңғай киім кисе, жолаушымен қарым-қатынас мәдениетін дамытса екен деген тілек білдірді. Оның бұл сауалын назарына алған қалалық ТҮКШ және жолаушылар көлігі бөлімі бастығының міндетін атқарушы Сабыр Әшелов аталмыш мәселелер адағы уақытта қаралатын болады деп атап өтті. Көп балалы ананың екінші тілегі жоғары оқу орнында оқитын бір баласының оқу ақысын төлеуге көмектесуді өтіну болды. Өткен жылғы оқу ақысын Парламент Мәжілісінің депутаты Нұртай Сабильянов төлеп беріпті.
Ал Знаменка ауылынан келген Н. есімді азаматша жеке кәсіп ашуға көмек көрсетуді өтінді. Өзінің айтуынша, тігіншілікпен айналысады екен. Кәсібін дамыту үшін жеңілдікпен берілетін шағын несие ала алмай жүргеніне біраз болыпты. Азаматшаның бұл мәселесі бойынша мемлекет тарапынан көрсетілетін жеңілдіктер жайында түсінік берген қала әкімінің орынбасары кеңес берді.
Жалпы, бұл жолғы қоғамдық қабылдауға жазылған азаматтардың басым көпшілігі тұрғын үй кезегі, баласын мүгедектік топқа өткізу, мемлекеттен әлеуметтік төлемақы алу мәселесін қозғады. Тіпті, демеуші ретінде қаражат беруді сұрап келген жандар да болды. Қабылдау барысында бұл азаматтардың басым көпшілігінің өз құқықтарын немесе мәселені шешудің оңтайлы тәсілдерін білмейтіндіктері, мемлекет тарапынан көрсетіліп жатқан көмектер мен үкіметтік бағдарламалардың игілігі жайлы хабарсыз екендіктері байқалды.
Қуаныш Жолымбет
