Семей қаласындағы Назарбаев Зияткерлік мектебінде әскери—қолданбалы спорт түрлерінен «Айбын» атты бірінші қалалық чемпионаттың салтанатты түрде ашылуы өтті. Ел Тәуелсіздігінің 25 жылдығына орай ұйымдастырылған сайысқа қаладағы 17 әскери—спорттық клубынан 300-ге тарта тәрбиеленуші жиналыпты. Спорттық шараның ашылу салтанатына Семей қаласы әкімінің орынбасары Надежда Шарова арнайы қатысты.
Жарыстың негізгі мақсаты республикалық «Айбын» әскери-спорттық ойындарына қала құрамасын іріктеу және болашақ Отан қорғаушыларды әскери-қолданбалы спорт түрлеріне машықтандыру болып табылады. Спорттық сайыстың өтуіне қалалық дене шынықтыру және спорт бөлімі ұйытқы болыпты.
— Бұл сайыстың өскелең ұрпаққа берері мол. Өйткені болашақта әскери мамандықты таңдайтын жасөспірімдер баршылық. Сол сәтте ұландарымыздың осындай додалардан алған тәжірибелері іс жүзінде қажет болатыны сөзсіз. Сайыс барысында қатысушылар 10 әскери-қолданбалы спорт түрінен өз мүмкіндіктерін паш ететін болады. Әр команда қатарында 13 баладан бар. Олар белтемірге тартылу, қорғаныш киімдері мен газтұтқышты дер кезінде кию, автоматты уақытқа жинақтау әрі бөлшектеу сияқты бірнеше сынақтарда өзара мықтыларды анықтайды. Үздік нәтижеге қол жеткізген өрендер республикалық чемпионатқа жол тартатын болады. Ал республикалық турнир Қарағанды облысында жаз мезгілінде өтеді деп жоспарлануда,- деді ҚР әскери-спорттық клубтар федерациясының Семей қалалық филиалының төрағасы Серік Түсіпов.
Спорттық сайыстың ашылуында сөз алған қала әкімінің орынбасары Надежда Шарова жарысқа қатысушыларға сәттілік тіледі.
— Құрметті жас сайыскерлер! Шаһарымызда тұңғыш рет «Айбын» әскери-спорттық турнирі бастау алып отыр. Барлықтарыңызды Семей қаласының әкімі Ермак Сәлімовтің атынан құттықтауға рұқсат етіңіздер. Бұл чемпионаттың ҚР Тәуелсіздігінің 25 жылдығы қарсаңында ұйымдастырылып отырғаны заңдылық. Еліміз әрқашанда өркендей берсін. Барлық командаларға ақ жол тілеймін,- деді өз құттықтауында Надежда Васильевна.
Аталмыш додаға тек жеңіс үшін келген сайыпқырандардың бірі қаладағы әскери-техникалық мектептің курсанты Әсет Сұлтанғазин. Ол әсіресе АК-47 автоматын уақытқа жинақтап бөлшектеуде алдына жан салмайды екен.
— Мұндай чемпионаттарға бірінші рет қатысып отырған жоқпыз. Бұған дейін де түрлі бәсекелерде бағымызды сынаған болатынбыз. Қарсыластарымыздың деңгейін білмейміз. Дей тұрғанмен де біз өз күшімізге сенімдіміз. Біздің құрамамыз атудан ешкімге дес бермейді. Жүлделі орындарға қол жеткізу үшін бар күш-жігерімізді жұмсауға тырысамыз, — деп атап өтті Ә.Сұлтанғазин.
Жақсылық МҰРАТҚАЛИҰЛЫ,
«Семей таңы»
