Ел Тәуелсіздігінің 25 жылдығына 25 мың түп тал егу Тарбағатай ауданында көктемнің алғашқы күндерінде белгіленген міндеттердің бірі болатын. Аудан әкімі Ділдабек Оразбаев өзі бастап қолға алған бұл игілікті шара өткен аптада ұйымдастырылған бүкілаудандық сенбілікте қорытындыланды. Терек, қарағаш қана емес, қылқан жапырақты ағаштар әкеліп бау-бақшаға отырғызу соңғы жылдары дәстүрге айналды. Мәселен, өткен жылы аудан бойынша төрт мыңның үстінде шырша егілсе, биыл 2050 түп шырша Тарбағатай топырағынан орын тапты.
Ақсуат, Ақжар, Тұғыл сияқты ең ірі ауылдарда ғана емес, шалғайдағы шағын ауылдарға дейін көркейту, көгалдандыру жұмыстары жақсы жолға қойылып, тал егу мен гүл егу қазір аудан бойынша қарқын алған. «Биыл ауылымызға 86 мың түп гүл егеміз»,- дейді Ақсуат ауылының әкімі Ғалымжан Нұғиев.
Биылғы бір ерекшелік — аудан басшысы Ділдабек Тәжібайұлы әрбір саябақты, әрбір аллеяны қоғамдық ұйым жетекшілеріне бөліп беріп, соның жұмысын жетілдіруді сеніп тапсырды. Мысалы, Бәйтерек төңірегін гүлдендіру аудан ардагерлері ұйымының басшысы М.Сахариевқа жүктелсе, «Мәңгілік Ел» саябағы облыс әкімінің кеңесшісі А.Сәметовке, Абай аллеясын ретке келтіру аудандық мәслихаттың хатшысы С.Жақаевқа тапсырылған екен.
Сенбіліктегі тал егу, оны суару, гүл егілетін алаңдарды дайындау түстен кейін де жалғасты. «Мәңгілік Ел» саябағының төңірегінде атқарылып жатқан жұмыстарға қанағаттанған сезіммен қарап тұрған аудан басшысының қасына А.Байқыдыров атындағы Ақсуат музыка мектебінің директоры Қалихан Сапоров келді. Өткен жылы мектебінің төңірегін гүлдендіру жұмыстары басқаларға үлгі ретінде бағаланған Қалихан биыл да сол биігінен төмендемейтінін айтты.
— Ділдабек Тәжібайұлы, осы бір ай мөлшерінде мектебіміздің жеті мұғалімі өз шәкірттерін халықаралық, республикалық, облыстық өнер сайыстарына апарып, жүлделі орын алып, аудан намысын қорғады, кеше ғана Мәдениет үйінде есепті концерт бердік,- деді. Бұл жетістікке риза болған аудан әкімі:
— Мынау жақсы жаңалық екен. Үлкен мерекелерде осы музыка мектебін де аудандық сахнаға шығарайық, балалар өнерін көрсетсін,- деді.
— Дұрыс айтасыз. Мейрамдарда үнемі Мәдениет үйінің әртістерін ғана көреміз, тыңдаймыз. Мысалы, түрлі жарыстарға қатысу жас спортшыны шыңдап, шынықтырса, жас өнерпаздың үйренетін, өсетін, үлгі алатын орны — сахна ғой,- деп өз ойын айтты Мұқан ақсақал осы жерде.
Сенбіліктегі жұмыстың қауырт шағында аудан басшысымен бірге алаңда жүрген аудандық мәслихаттың хатшысы Сәумен Жақаевты әңгімеге тарттық.
-Көркейту, көгалдандыру айлығы табысты өтіп жатыр. Атқарылған жұмыс көзге көрініп тұр. Ең қуаныштысы – азаматтардың өз ауласын, ауылын көркейтуге деген ынтасы артып келеді. Демек, осы саладағы істі халық қолдап отыр. Жаңа ғана аудан әкімі Ділдабек Тәжібайұлы енді бір алаңға тек қана жеміс ағаштарын ексек, тағы бір жерге тек қана қайың өсіріп, қарағайлы орман жасасақ деген ұсыныс айтты. Міне, Марқакөлден біздің ауданға жерсіндіруге әкелінген шыршалар қандай тамаша өсіп келеді. Көркейту, көгалдандыру жағынан да мақтана аламыз,- деді Сәумен Жақаев.
Хамза СӘТИЕВ, «Семей таңы»
