Күні кеше ғана Президентіміз «Қазақстан жолы — 2050: Бір мақсат, бір мүдде, бір болашақ» атты Қазақстан халқына кезекті Жолдауын жария етті. 1997 жылдан бастау алған Елбасының 18-ші Жолдауының басты ерекшелігі — Қазақстанды 2050 жылға дейін әлемдегі дамыған 30 елдің қатарына қосу жоспары нақтыланып, «Мәңгілік Ел» идеясына баса екпін түсіруінде болды. Келешегіміздің келбетті, болашағымыздың баянды болуы бүгінгі жастарға, яғни, біздерге тікелей байланысты. Осы Жолдауда айтылған әрбір сөз жадымызда жатталып қалуы тиіс. Өйткені, «Қазақстан-2050» Стратегиясы болашақ ұрпаққа арналған бағыт-бағдар. Елдің болашағы ол-біз, жастар. Болашақ бүгіннен басталатынын ескерсек, осы Стратегияны іске асырып, Қазақстанды дамыған 30 елдің қатарына қосып, «Мәңгілік Елдің» ертеңі үшін аянбай еңбек ету — біздің абыройлы міндетіміз.
Мемлекет басшысы саяси құжатта «Мәңгілік Ел – ата-бабаларымыздың сан мың жылдан бергі асыл арманы. Ол арман – әлем елдерімен терезесі тең қатынас құратын, әлем картасынан ойып тұрып орын алатын Тәуелсіз Мемлекет атану еді. Ол арман тұрмысы бақуатты, түтіні түзу ұшқан, ұрпағы ертеңіне сеніммен қарайтын бақытты Ел болу еді. Біз армандарды ақиқатқа айналдырдық. Мәңгілік Елдің іргетасын қаладық!» деген еді.
{jcomments on}Қазақстан 22 жылда қос ғасырға бергісіз жолды жүріп, талай толайым табыстарға жетті. Мұның барлығы өздігінен бола салған жоқ. Күллі ел болып жұмылып, тынымсыз еткен еңбектің, сол еңбекке барша халықтың басын біріктірген бірліктің, бірлік болмай тірлік болмасын әрбір азаматтың жетесіне жеткізе ұғындырып, жөн мен жол сілтеп, елге бас бола білген Елбасының жүргізген сарабдал саясатының арқасында ғана мүмкін болды. Алысты көздейтін сұңғыла саясат иесі Нұрсұлтан Әбішұлы мемлекеттің міндеті — тер төгіп, еселі еңбек етемін деген адамға кешенді жағдай жасау, ғылымды дамыту, индустрияны өркендету, қазақ тілінің мәселесі, денсаулық саласы туралы, 2016 жылы елде қазақстандық қоғамның негізгі құндылықтарын негіздейтін жаңа құжат — «Мәңгілік Ел» патриоттық актісі жасалатындығын, Қазақстанда мәдениетті саясаттың тұжырымдамасы қабылданатынын атап өтті.
Тарихи Жолдауда жастар үшін жағымды жаңалықтың бірі — 2016 жылы шәкіртақы көлемінің 25 пайызға, ал, білім саласы қызметкерлерінің еңбекақысы 2015 жылы 29 пайызға артуы оларды қатты қуантты. Біз, жастар, Қазақстанның жылдан жылға қарқынды дамып, дамыған өркениетті 30 мемлекеттің қатарына нық қадам басатынына үлкен сеніммен қараймыз. Ендігі мақсат -Жолдауды жүзеге асыру.
Еркебұлан САЙЛАУБЕКҰЛЫ, Шығыс Қазақстан облысы жастар саясат мәселелері
басқармасының маманы.
