Жаз басталысымен, қала көшелеріндегі халық көп шоғырланған жерлерде алкогольді ішімдіктерді саудалайтын жазғы шатырлар көбейіп кететіні жасырын емес. Биылдың өзінде Семей бойынша мұндай шатырлардың саны 20-ға жуықтапты. Белгілі болғандай, оның тек 8-інде ғана заңды түрде жұмыс істеуге рұқсаттары бар болып шықты. Бұл туралы кеше, 13 шілде күні, қалалық ақпарат орталығында осы тақырыпқа арқау болған баспасөз мәслихатында Семей қаласы ІІБ жергілікті полиция бөлімінің басшысы Радик Сайфутдинов мәлімдеді.
Сондай-ақ баспасөз жиынында соңғы уақытта семейліктер арасында резонанс тудырып, халық қызу талқылап жатқан қант бағасының қымбаттауы да сөз болды. Бірақ алдымен құқық қорғау органы қызметкерлері БАҚ өкілдеріне қоғамдық тәртіп пен жазғы шатырларға қатысты атқарылып жатқан істерді айтып берді.
— Бұл бағыт бойынша, шаһар басшысының тапсырмасына сәйкес, учаскелік полиция инспекторлары әкімшілік полиция бөлімінің табиғатты қорғау бөлімшесімен бірлескен рейд жұмыстарын жүргізді. Оның нәтижесінде 9 жазғы шатырдың заңсыз түрде жұмыс істегені анықталды. Олардың иелері әкімшілік жауапкершілікке тартылып, 5 АЕК көлемінде айыппұл салынды. Бүгінде барлық айыппұл толық өндірілді. Дегенмен де біздің мұнымен тоқтап қалмақ ойымыз жоқ. Барлық жиналған материалдарды жер инспекциясына жібердік. Енді қаланың атқарушы билігі қолда бар материалдарға жүгіне отырып, сотқа шағымданатын болады. Жақында Чехов көшесі мен Шығыс кентіндегі Қамбар сауда үйінің маңындағы жазғы шатырлардың иелерімен профилактикалық жұмыстар жүргізілді. Біз оларға қызметтері заңға қайшы екендігін түсіндірдік. Нәтижесінде аталмыш тұлғалар шатырларын өз еріктерімен алып тастады. Жыл басынан бері жергілікті полиция қызметі қаланы көркейту мен абаттандыруға байланысты 1 120 әкімшілік іс қозғады. Ұсақ бұзақылық бойынша 1112 факті тіркелді. Өткен жылы бұл көрсеткіш 654 материалды құраған болатын. Сонымен қатар Түйемойнақ аралындағы тәртіпті ретке келтіруге байланысты біршама іс атқарылды. Мәселен, аралда тұратын 20-ға жуық отбасы 100-ден аса ірі қара малды баптап, өсіретіндігі анықталды. Солардың ішінде 9 азамат малды рұқсат етілмеген жерде баққаны үшін әкімшілік жауапкершілікке тартылып, оларға 20 АЕК-те айыппұл салынды,- деді Рафик Харисұлы.
Бұдан өзге жергілікті полиция бөлімінің басшысы жабайы сауданың алдын алуға байланысты атқарылып жатқан шараларға да тоқталды. Мәселен, ағымдағы жылы тәртіп сақшылары осы жағдайға қатысты 684 әкімшілік хаттама толтырыпты.
— Үстіміздегі жылы Чехов көшесі бойында рұқсат етілмеген жерде сауда жүргізгені үшін 120 адамға 254 мың теңге көлемінде айыппұл салынды. Аймауытов көшесінде дәл осындай айыппен 54 адам жауапкершілікке тартылды. Айыппұл көлемі 106 мың теңгені құрады. Сонымен қатар «Южный» сауда үйінің маңында жабайы саудамен айналысқан 70 тұлғаға әкімшілік жаза белгіленді. Қорыта айтқанда, бұл бағыттағы жұмыстарды алдағы уақытта үдете түсуді көздеп отырмыз,- деп түйіндеді өз сөзін полиция майоры Р.Сайфутдинов.
Осыдан кейін баспасөз жиынында қант тапшылығы мәселесі көтерілді. Жыл сайын дәл осы мезгілде қант жетіспеушілігі байқалатыны жасырын емес. Бар болғанның өзінде, оның құнын саудагерлердің аспандатып жіберетіні бар. Биылғы тосап қайнату науқанында осы азық-түлік шикізатының бағасы келісіне 300 теңгені құрап, рекордтық межеге жетті. Бұл жағдай қала тұрғындарының наразылығын тудыруда. Тұрғындар биылғы тосаптың тым қымбатқа түсіп жатқандығын ашық айтып, не істерін білмей дал. Анықталғандай, Семейде күнделікті пайдаланылатын қанттың мөлшері 14 тоннаны құрайды екен. Ал қантты қалаға жеткізумен үш ірі тасымалдаушы айналысатындығы белгілі болды. Олар «Ақ сұңқар» ЖШС, «Спутник» ЖШС және ЖК Ермеков – «Қант орталығы». Ал қалалық кәсіпкерлік бөлімнің жетекшілері семейліктерге алаңдауға еш себеп жоқ екендігін айтып, тек қантты шаһарға жеткізу барысы кешеуілдеп жатқандығын алға тартады.
— Қазіргі таңда «Ақ сұңқар» ЖШС мен ЖК Ермековте қажетті қант қоры жоқ. Дей тұрғанмен де олар қантқа тапсырыс беріп, қаржысын толығымен төлеп қойған. Тек қана Семейге жеткізілуі кідіріп тұр. Қазақстанда екі ірі қант зауыты жұмыс істейді. Оның бірі Таразда, ал екіншісі Меркеде орналасқан. Соңғысы жуық арада ғана іске қосылған-тұғын. Осы себептерге байланысты қант шаһарымызға жетпей, кешігіп жатыр. Бұл ретте біз Орталық Азия Қант Корпорациясымен қаламызға қантты тезірек жеткізу мәселесі бойынша тиісті келіссөздер жүргіздік. Қазіргі күнде тек «Спутник» ЖШС-де ғана 30 тоннадай қант қоры бар. Алайда олар оны өздерімен келісімге отырған бөлшек саудамен айналысатын кәсіпорындарға ғана босатуда. Соған қарамастан, абыржуға негіз жоқ. 18 шілдеге дейін қажетті қант мөлшері Семейге жеткізілетін болады,- деп сендірді қалалық кәсіпкерлік бөлімінің сауданы дамыту секторының меңгерушісі Айжан Хасенова.
Жақсылық МҰРАТҚАЛИҰЛЫ, «Семей таңы»
