Қала тұрғындары қалаішілік жолаушылар тасымалдаушы мекемелер жұмысының сапасына үнемі наразы. Ал бұған қоғамдық көлікпен қамтамасыз етушілер кәсіпкерлер әр кез өз уәждерін айтып келеді. Бұған дейін тасымалдаушылар бірнеше мәрте тарифті көтеру мәселесін де көтерген болатын. Қоғамдық көліктің жұмыс сапасын жақсарту мақсатында қаламыздың атқарушы билігі Астана қаласында болып, ондағы диспетчерлік бақылау жүйесінің жұмысымен танысып қайтқан еді.
Жаңашылдық, диспетчерлік бақылау жүйесі, қала тұрғындары үшін таңсық емес, өйткені осыдан бір жылдай уақыт бұрын аталған жүйе Семейге де енгізіліп, кейін белгілі себептермен жұмысы тоқтап қалған болатын. Алайда диспетчерлік автоматтандырылған жүйе осы айдан бастап қаламызда қайтадан толық негізде жұмыс істей бастады. Апта сәрсенбісінде Семей қаласының жолаушы тасымалын бақылау орталығында жолаушылар тасымалын диспетчерлендіру жүйесінің таныстырылымы өтті.
Жолаушылар тасымалын диспетчерлендіру жүйесін қазақстандық «KazInterSoft» компаниясы әзірлеген. Мұндай жүйе Астана, Ақтау, Көкшетау, Қостанай, Талдықорған, Орал қалаларында бар көрінеді. Аталған жүйе барлық өңірлер үшін ортақ болып табылады. Жүйе автобустар мен маршруттардың қозғалыс арақашықтығын сақтауын, тасымал көлігінің кешкісін ерте кетіп қалмауын қадағалау, бір-бірінен жолаушыларды алып кетуге тырысатын жүргізушілердің «жарысы» мен тағы да басқа бірқатар проблемаларды шешуге арналған. Семей қаласының жолаушы тасымалын бақылау орталығының директоры Бейсенғазы Тастекеевтің айтуынша, автоматты бағдарлама, ең бастысы, қаладағы 400-ге жуық қоғамдық көлікті бақылауға мүмкіндік береді.
— Семейліктердің қоғамдық көлік қозғалысына көңілдері толмайтыны жасырын емес. Айталық, өзара арақашықтықтың сақталмауы, қоғамдық көліктердің аздығы және кешкілік уақытта автобустардың уақытынан бұрын тоқтап қалатыны жайлы көп айтылып жүр. Әрине, бүгінгі күні қоғамдық көліктердің арнайы бағыт кестесі бар. Дегенмен қаладағы 400-ге жуық қоғамдық көлікті толықтай бақылау мүмкін емес. Сондықтан да бүгінгі іске қосылып отырған GPS бағдарламасы арқылы біз автобустарды спутник арқылы бақылап отыратын боламыз. Яғни, аталған бағдарлама арқылы біздің диспетчер-операторлар мен тасымалдаушылардың диспетчерлері қоғамдық көліктердің қозғалысын бақылай алады,- дейді Б.Тастекеев.
Бұдан өзге бағдарлама тұрғындарға қолжетімді болу мақсатында «KazInterSoft» компаниясы «infobus» бағдарламасын ұсынып отыр. Айталық, әрбір тұрғын www.infobus.kz порталы немесе оның мобильдік қосымшасы арқылы аталған бағдарламаға кіріп, қоғамдық көліктердің қозғалысын бақылауға мүмкіндігі бар. Бұл жолаушыларға өзіне қажетті қоғамдық көлікті анықтап, журу бағытын көруге мүмкіндік береді.
— Бұл, бір жағынан, орынсыз түскен шағымдарды анықтауға да септігін тигізеді. Осы тұрғыда біз аталған бағдарлама арқылы шағымның қаншалықты шындыққа жанасатынын біле аламыз. Шағым расталған жағдайда, барлық ақпарат тиісті жерге жіберіліп, шара қолданылатын болады. Сондықтан аталған бағдарлама өте қажет,- дейді жолаушы тасымалын бақылау орталығының директоры Бейсенғазы Тастекеев.
Жоғарыда аталған бағдарламамен қалалық қоғамдық көліктің біразы жұмыс жасағанын айтып өттік. Дегенмен ол кезде қаладағы екі тасымалдаушы ғана аталған бағдарламаға қосылып, қалғаны желі арқылы жүйеге кірген қоғамдық көліктердің жұмысына қиындық тудырған екен. Бүгінгі күні диспетчерлік бақылау жүйесіне қаладағы барлық алты тасымалдаушы қосылып отыр. Айта кетуіміз керек, аталған бағдарламаны алуға жергілікті билік 4 млн. теңгеден астам қаражат бөлген, ал автобустарға қажетті құрылғыларды тасымалдаушылар өз қаражаттарына сатып алған.
Асан МЫРЗАХАН, «Семей таңы»
