Семей қаласы әкімінің жанындағы Діни бірлестіктермен байланыс жөніндегі кеңестің кезекті отырысы өтті. Семей қаласы әкімінің орынбасары Надежда Шарованың төрағалығымен өткен кеңес отырысына дербес бөлім басшылары, үкіметтік емес ұйымдардың жетекшілері және дәстүрлі діни конфессиялардың өкілдері жиналды.
Кеңесте, күн тәртібіне сәйкес, Семей қаласының дене шынықтыру және спорт бөлімінің діни экстремизм мен терроризмге қарсы іс-қимыл жөніндегі 2013-2017 жылдарға арналған мемлекеттік бағдарламаның іске асырылуы, Семей қаласының кітапханаларындағы діни кітаптармен танысу мақсатындағы жұмыс нәтижесін талқылады. Алғашқы сұрақ бойынша қалалық дене шынықтыру және спорт бөлімінің бас маманы Қуат Исажанов баяндама жасады. Ол өз сөзінде бұқаралық спортты дамыту мақсатында қала тұрғындарына қызмет көрсетіп келе жатқан спорттық нысандарды тізбектеп берді.
— Қазіргі уақытта Семейде 300 мыңнан астам халық тұрады. Оның ішінде оқушылар мен студент жастардың саны 100 мыңнан асады. Осы жастарды салауатты өмір салтына баулу үшін қалада 380 спорттық құрылым жұмыс істейді. Дәлірек айтқанда ,7 бассейн, 4 стадион, 5 спорттық кешен, 123 спорт залы, 1 дене шынықтыру және сауықтыру спорт кешені, 5 шаңғы базасы, 5 ату тирі, 2 үлкен мұз айдыны, 22 шағын футбол алаңы, 130 арнайы және 72 орнатылған спорт залы халық игілігіне берілген. Бұдан бөлек қалаға қарасты барлық ауылдық округтерде де спорттық залдар бар. Онда екі мыңнан астам балалар мен ересектер спортпен шұғылдануда. 2014 жылдан бастап ауыл жастарының спартакиадасы қайта жанданды. Оған 700-ден астам адам қатысып үлгерді. Биыл аталмыш ойындардың ақтық сайысы қазан айында Семейде өткізіледі деп көзделіп отыр. 2013 жылдан бастап өңірімізде спортты жанына серік еткен халықтың саны өскені байқалды. Мәселен, 2013 жылы халықтың 13, 3%-ы спортпен кешенді түрде шұғылданғаны тіркелген. Ал 2015 жылы бұл көрсеткіш 29, 2%-ға дейін өскен. Үстіміздегі жылдың 9 айында қала халқының 29, 4%-ы бұқаралық спортқа ден қойғаны анықталды. Сол секілді шаһарда үш облыстық спорт мектебі қызмет ететінін айта кету керек. Ал спорт федерацияларының саны 23, спорт клубтарының саны 27. Жоғарыда келтірілген 380 спорттық құрылымдардың ішінде 4 нысан 1000 адамға дейін қабылдауға қауқарлы,- деді қалалық дене шынықтыру және спорт бөлімінің бас маманы.
Десе де жетекші маман проблемалы сұрақтардың да жоқ емес екендігін жасырмады. Атап айтқанда, қалада арнайы футбол манежі мен хоккей модульдері жетіспейтіні анықталды. Сондай-ақ Қ.Исажанов спортшыларды жат ағымдардың ықпалынан сақтау үшін бапкерлік құрам түсіндіру жұмыстарын жүргізетінін тілге тиек етті. Бұған қоса спорттық іс-шаралардың қауіпсіздігін қамтамасыз ету мақсатында бейнебақылау жүйелерін орнатуға қатысты да бірқатар істер қолға алынған екен. Отырыс барысында Кеңес мүшелері өздерін толғандырған сауалдарын жолдап, өзара пікір алмасты.
Жақсылық МҰРАТҚАЛИҰЛЫ, «Семей таңы»
