Соңғы кездері оқушы мен мектеп және ата-ана арасында жаңартылған білім мазмұнына қатысты мәселелер аз туындаған жоқ. Соның бірі – бағалау жүйесі. Қалыптасқан бағалау түріне үйренгендерге жаңа бағалаудың мәнісін әу баста бірден түсіне қою оңай болған жоқ. Тоқсан бойы «5»-тік алып қуантқан балалары «жақсы» деп қорытылғанда, талай ата-ана абдырап қалғаны рас. Осы жағдайларды ескере отырып, жаңа жүйенің артықшылықтары мен мәнісін түсіндіру мақсатында 25 сәуір, сәрсенбі күні №49 жалпы орта білім беретін мектепте білім бөлімі «Жаңартылған білім мазмұнын енгізу: проблемалары және болашағы» тақырыбында Ашық есік күнін ұйымдастырды. Оған шаһар ұстаздары мен ата-аналар қатысты.
— Жаңартылған білім мазмұнына орай ақпарат беру, түсіндіру жұмыстарын жүргізу, туындаған мәселелердің шешімін қарастыру мақсатында ата-аналар мен ұстаздарды қатыстырып бүгінгі Ашық есік күнін ұйымдастырып отырмыз. Міндеті – жаңартылған білім мазмұнын енгізудің кезеңдері мен деңгейлерін, бір сәтке болса да оқушы орнына партаға жайғасқан ата-аналарға шеберлік сыныптары арқылы бағалау формаларын түсіндіру,- деді қалалық білім бөлімі әдіскерлері кабинетінің меңгерушісі Гүлфия Ахметова.
Білім бөлімі мамандарының айтуынша, әсіресе бағалау жүйесіне орай сұрақтар көп туындайды екен. Бұрын, салыстырмалы түрде, Айжанға қарағанда Аружан толыққанды жауап бергендіктен, Айжанға «5», Аружанға «4» қойылса, қазіргі таңда әр бала жеке тұлға ретінде деңгей бойынша бағаланады.
— Жаңартылған білім мазмұнына сай баға салыстырмалы түрде қойылмайды. Өз білімін тәжірибе жүзінде жүзеге асыра алатын құзыретті тұлғаны тәрбиелеуіміз керек. Формативті бағалау бойынша бағаланған әрбір бала мектепке дейінгі мекемеден бастап, ай бойы алған бағасымен бірге, қорытынды бақылаулары маңызды рөл ойнайтынын ескеретін болады. Бұрын «5» көп алса, бақылаудан «4» алса да «үздікке» қорытылатын. Қазір қорытынды тоқсан бойы алған бағасына ғана байланысты болмайды,– деді ГүлфияАхметова.
Ашық есік күнінде информатика пәнінің мұғалімдері интернет-сайттармен жұмыс істеу, онлайн тест тапсыру, электронды бағдарламаларды пайдалану тұрғысында ата-аналарға ақпарат берді. 14 кабинет бойынша пәндік сабақтар өткізіліп, ата-аналар оқушылар тәрізді сабақ тыңдап, баға алды. Яғни жаңаша бағалаудың мәнісі түсіндірілді.
Алғашқы бөлім бойынша пән кабинеттерінде ақпарат алып, сабақ оқып, бағаланған ата-аналар Ашық есік күнінің екінші бөлімінде акт залына жиналып, білім бөлімінің басшысы Наталия Фесенкоға және ұстаздар қауымына көкейлерінде жүрген сауалдарын жолдап, жауап ала алды. Сөз алған ата-аналар саладағы өзгерістерге орай өз ойларын да жеткізді.
— Жаңартылған білім мазмұнына сай балалардың 5 күндік білім алғанына қарсы емеспін. Бала ата-анасының жанында көбірек болуы керек. Алғашында бағалау жүйесі бойынша сұрақтарымыз болған. Бірақ қазір мәнісін түсіндік. Әр баланың өз мүмкіндігіне, тәрбиесіне, біліміне қарай бағаланғаны да дұрыс. ХХІ ғасырдағы дамуымызға сәйкес білім саласына енгізіліп жатқан өзгерістерді де қолдаймыз, дамыған мемлекеттерден қалыс қалмай, біздің еліміздің де көші ілгерілеуі керек қой,- деді Данара Мұстаханова есімді ана.
Әйгерім СӘРСЕНҚАЛИ, «Семей таңы»
