«Елбасы Нұрсұлтан Назарбаев «Бірлесе білген ел бәрін жеңеді» атты мақаласында мемлекетіміздің түрлі кезеңдегі қиындықтардан қалай шыққаны туралы кеңінен баяндады. Иә, дүниені дүрбелеңге салған пандемия бүкіл әлемде жаңа экономикалық дағдарыс туғызып отыр. Қауіпті індетпен күресуге қауқары жетпеген кейбір елдің шеккен зардабын көргенде, кез келген адамды қорқыныш билейтіні анық. Әрине, үрей мен қорқыныш індетке жол ашып береді. Сондықтан негізсіз алаңдауға болмайды. «Жұмыла көтерген жүк жеңіл» демекші, бұл індетті жеңіп, еліміз қалыпты тірлікке оралу үшін біз бірлесе күресіп, әрқайсымыз жауапкершілікті сезінуіміз қажет», – дейді «Nur Otan» партиясының ШҚО филиалы төрағасының бірінші орынбасары Олег Чугунков.
Тұңғыш Президент Нұрсұлтан Назарбаевтың бастамасын жүзеге асыру аясында Өскемен мен Семейдің қолдауға мұқтаж тұрғындары республикалық «Біргеміз» қоғамдық қорынан 50 мың теңгеден ақшалай көмек алды. Төлемдердің жалпы сомасы 620 миллионнан астам теңгені құрады.
«Nur Otan» партиясының ШҚО филиалы төрағасының бірінші орынбасары Олег Чугунковтың айтуынша, көмек шектеу шаралары енгізілген қалалардың тұрғындарына – әлеуметтік жағынан аз қамтылған топтарға жататын кірісі ең төмен азаматтарға көрсетіледі. Олардың ішінде аз қамтылған және көп балалы, сондай-ақ ерекше қажеттіліктері бар баланы тәрбиелеп отырған отбасылар, сонымен қатар қолдауды қажет ететін мүгедектер мен ең төменгі зейнетақы алатын, халықтың әлеуметтік әлсіз топтарының тізіміне енгізілген зейнеткерлер бар. Жетім балалар мен соғыс ардагерлері және оларға теңестірілген тыл еңбеккерлері, мүгедектер де қолдауға ие болады.
Мәселен, Өскеменде 5 005 адам, Семейде 7414 адам 50 теңге көлемінде қаржылай көмек алды. Аталған қаражат екінші деңгейлі банктер арқылы жеке тұлғаның карточкасына немесе ағымдағы шотына аударылды. Бұл ретте банк комиссиясы алынбайды және түскен қаражат несиесі бар азаматтардан несие берешегін өтеу үшін ұсталмайды.
Өскемен қаласының тұрғыны Маржан Бадыганова: «Сіздің шотыңызға 50 мың теңге ақша түсті. #BizBirgemiz #МыВместе # Елбасы # Nur Otan» деген мәтіндегі SMS-хабарлама алғанда таң қалғанын айтады.
– Менің төрт балам бар, қазір декреттік демалыста жүрмін. Қалада шектеу шаралары енгізілгендіктен, жұбайым уақытша жұмыссыз қалды. Сондықтан біз үшін бұл ақша айтарлықтай қолдау болып отыр. Осындай қиын сәтте біз сияқты жандарды естен шығармай, қолдау көрсетіп жатқан Елбасымыз бен «Nur Otan» партиясына алғысымды білдіргім келеді, – деп ризашылығын жеткізді көп балалы ана.
«Біргеміз» қоры аударған қаражат қиын жағдайға тап болған Самсоновка ауылының тұрғыны Наталья Бахватдиноваға дер кезінде көрсетілген қолдау болып отыр . Біраз уақыт бұрын отағасынан айырылған оның кәмелетке толмаған төрт баласы бар. Қалада енгізілген шектеулерге байланысты Наталья Бахватдинова да жұмыссыз қалған.
– Мен «Nur Otan» партиясына және Елбасының осы қиын-қыстау уақытта отандастарын қолдауға шақырған үндеуіне іспен жауап берген барлық жаны жомарт жандарға үлкен алғысымды білдіргім келеді. Бізге көмек қолын созғандарыңыз үшін рақмет», – деді Наталья Бахватдинова.
Семей қаласы ақпараттық орталығы{jcomments off}
