Тарбағатай ауданының орталығы Ақсуатта, мәдениет үйінің алдындағы алаңға артына мол мұра, рухани қазына қалдырған, ұлттың жоғын жоқтаған, жұрт мүддесін ойлаған, ел тағдырын жырына арқау еткен біртуар ақын Кәрібай Таңатарұлының ескерткіші орнатылды.
Ескерткіштің ашылу салтанатында Тарбағатай ауданы әкімінің орынбасары Ержан Сабырбаев, журналист Мейрам Оралов құттықтау сөз сөйледі.
Баласы Таңатардың мен – Кәрібай.
Болыппын малға кедей, өлеңге бай.
Сөзімді біреу мақтар, біреу сөгер,
Жұртқа тегіс ұнауы екіталай.
Артына сөз қалдырған өлмейді деп
Айтқанын ұғыңыздар ақын Абай,-
деп жырлаған Кәрібай ақынның рухы тәуелсіздіктің арқасында туған халқымен қайта қауышты.
Кәрібай Таңатарұлының есімі ертеректе Әсет Найманбайұлымен айтысы арқылы ғана қалың көпшілікке белгілі болса, тәуелсіздіктен кейін әр жерден жинақталған шығармалары насихатталып, әдеби ортада таныла бастады. Жылдар бойы санасында ғана сақтап келген Тарбағатай жұртшылығы ақынмен рухани қауышып, асылын тапқандай, өшкен отын жаққандай қуанды. Республикалық, облыстық, аудандық газеттерге дүркін-дүркін Кәрібай Таңатарұлы туралы мақалалар жарияланды. Өлкетанушы, шежіреші, ақтаңгер ақын Қалихан Алтынбаев, шежіреші, ардагер Мәулітхан Сыдықов, ағайыны Тортай Жағыпаров, ақын Серік Жұматовтар ақын өлеңдерін ұрпақ жадында жаңғыртып, насихатталуына үлес қосты. 1995 жылы Әл-Фараби атындағы Қазақ ұлттық университетін бітіруші ретінде дайындаған «Әсетпен айтысқан Кәрібай ақын шығармашылығы» тақырыбындағы дипломдық жұмыс ұстазым, профессор Тұрсынбек Кәкішевтің жетекшілігімен жазылған болатын.
«Тарбағатай ауданының Қарғыба ауылында дүниеге келіп, алаштың ортақ перзентіне, хас тұлпарына айналған Кәрібай Таңатарұлының еңбектері ғылыми айналымға енгізуді, жаңаша пайымдауды қажет етеді. Ақынның туған жылы туралы пікір сан алуан. 2002 жылы жарық көрген Қазақстан ұлттық энциклопедиясының 4-томында 1861 жыл деп берілсе, енді бір деректерде 1873, 1866 деп қате көрсетіліп жүр. Ақынның туған жылы 1872 жыл екендігі өз өлеңінде тайға таңба басқандай жазылып тұр. Олай болса, 2022 жылы сан қырлы талант иесі Кәрібай Таңатарұлының туғанына 150 жыл толады. Ақын есімін ұлықтап, ұрпағының есінде сақтау үшін туған жері Қарғыба ауылындағы Ю.Гагарин атындағы мектепке Кәрібай Таңатарұлының есімі берілсе,
…Жыр ағып, көкірегімнен өлең гулеп,
Суындай тасып аққан Қарғыбаның.
Ендігі бар арманым осы болды,
Артыма қандай еңбек қалдырамын…-
деп толғанған, еркіндікті аңсаған ақын арманының орындалғаны сол болар еді»,- дейді ҚР мәдениет қайраткері ақын Серік Әкірамұлы Қалиев.
Хамза СӘТИЕВ, «Семей таңы»{jcomments off}
