Өткен апта соңында Шығыс Қазақстан облысының әкімі Даниал Ахметов көктемгі су тасқынына дайындықтың соңғы кезеңін пысықтап, бүгінгі ахуалды бағамдау мақсатында жиын өткізді.
Ауа температурасының көтерілуіне және су айдындарында мұздың еруіне байланысты өңірде су тасқынына қарсы қарқынды шаралар жалғасуда. Жиын барысында айтылғандай, бүгінгі таңда 564 мың текше метр қар шығарылған. Жедел штаб өкілдері 3779 автокөлік жолындағы, 160 темір жолдағы су өткізу құрылыстарын, 575 көпірді, 689 арық пен каналды тазартты. 2412 техника, 377 мотопомпа және 108 эвакопункт дайындалған.
– Су басу қаупі бар 19 елді мекен үшін уақытша орналастыру пункттері қарастырылған. Сондай-ақ Алтай ауданында 32, Катонқарағай ауданында 21, Бесқарағай ауданында 13, Глубокое ауданында 30 мотопомпа әзірленді. Қалалар мен аудандардың әкімдіктері 109,6 мың дана қап, 15,5 мың тонна инертті материал, 532 тонна ЖЖМ дайындады, – деді ШҚО Төтенше жағдайлар департаментінің басшысы Ерлан Нұрпейісов.
Оның айтуынша, 31 наурызға жер тоңы Күршім ауданында 150 см, Катонқарағай ауданында 147 см, Бесқарағай ауданында 124 см, Зайсан ауданында 120 см, Бородулиха ауданында 110 см және Алтай ауданында 119 см деңгейде болған.
Өз кезегінде аймақ басшысы Даниал Ахметов аудан әкімдеріне су тасқыны қаупі бар барлық елді мекендерді қайта аралап шығып, жағдайды баяндауды тапсырды.
– Жағдай күрделі. Күшейтілген жұмыс жүргізіліп жатқанын көріп отырмын. Орынбасарым Бақытжан Байахметовке және ШҚО Төтенше жағдайлар департаментінің басшысы Ерлан Нұрпейісовке қажетті техникалық ресурстарды Катонқарағай, Бесқарағай, Глубокое, Көкпекті және Алтай аудандарына жіберу үшін ТЖД жергілікті атқарушы органдарының күштер резервін қалыптастыруды тапсырамын. Қажеттілік туындаған жағдайда, жарты сағат ішінде су басқан аумаққа қарай жіберу керек, – деді ШҚО әкімі.
Сөз орайында айта кетсек, арнайы мамандар тікұшақпен су тасқыны жағдайына байланысты мониторинг жүргізген. ШҚО ТЖД департаменті баспасөз қызметінің мәліметіне сүйенсек, мониторинг барысында аймағымыздағы су тасқыны қаупі бар учаскелерге бақылау жасалған. Шараға Шығыс Қазақстан облысы әкімінің орынбасары Бақытжан Байахметов, ШҚО ТЖД, «Қазселденқорғау» ШҚ филиалы және «Қазгидромет» РМК мамандары қатысқан. Аэровизуалды бақылау Өскемен – Глубокое ауданы – Алтай ауданы – Катонқарағай ауданы – Өскемен бағыты бойынша жүргізілген.
– Мониторинг барысында Бұқтырма, Красноярка, Глубочанка өзендерінің арналары қаралды. Аэровизуалды зерттеулер гидрологиялық жағдайдың тұрақтылығын көрсетті. Өзендердегі су деңгейі қауіпті шектен төмен, – дейді ШҚО ТЖД төтенше жағдайлардың алдын алу басқармасы басшысы Алексей Штыкель.
Облыс аумағында қар еритін кезең басталды. Аймақтағы қар басқан аумақ соңғы 2 аптада 97% – дан 55%-ға дейін азайған. Жер тоңының жоғары қабаты жіби бастаған. Күршім, Катонқарағай, Бесқарағай, Зайсан, Алтай және Бородулиха аудандарында жер тоңының бір метрден астам қатуы сақталған.
Өз тілшіміз
