Қала әкімінің есептік кездесуі
КӨТЕРІЛГЕН МӘСЕЛЕЛЕР РЕТІМЕН ШЕШІМІН ТАБАДЫ
Семей қаласы әкімінің есеп беру кездесуі Водный, Восход және Шығыс кенттерінде де өтті. Бақытжан Байахметов ауыл тұрғындарын қаланың әлеуметтік-экономикалық даму көрсеткіштерімін таныстырды.
Мысалы, 2021 жылы өнеркәсіп өнімінің көлемі 315,6 млрд теңгені құрап, 20,2 пайызға өсті, ал өңдеу өнеркәсібінің көлемі 261,4 млрд теңгені құрап, 24,2 пайызға өсті.
Жұмыс істеп тұрған шағын және орта кәсіпкерлік субъектілерінің саны 2021 жылы 6,8 пайыз өсіммен 22,8 мың бірлікке дейін, ал қала бюджеті кірістері бойынша 25,1 пайыз өсіммен 32,5 млрд. теңгеге өсті.
Есеп беру жиынында тұрғындар тарапынан қойылған сұрақтардың көпшілігі аталған үш кенттің абаттандырылуы мен ауыз су, балабақша, отбасылық дәрігерлік амбулатория және басқа да әлеуметтік нысандардың жетіспеушілігі, қоғамдық көліктің жұмысы сынды өзекті мәселелеріне қатысты болды.
Айта кету керек, соңғы уақытта қала билігі шеткі аймақтарды абаттандыру мәселелерін шешуге ерекше назар аударуда. Мысалы, Шығыс кентінің сол жағында саяжай массивін электрмен жабдықтау үшін трансформаторлық қосалқы станциялар орнатылды. Су құбыры желілерін қайта жаңартуға және кеңейтуге жобалық сметалық құжаттама әзірленді. 1200 орындық мектеп салынды, 320 орындық балабақша мен мектепке арналған қазандық салынды. Усть – Каменогорская көшесіндегі жер асты өткеліне ағымдағы жөндеу жұмыстары жүргізілді. 10 көшенің сыртқы жарықтандыруы қайта жаңартылды.
Восход кентінде Карьерная көшесін жарықтандыруға ағымдағы жөндеу жұмыстары жүргізілді, Восход және Водный кенттерінде су құбыры желілерінің құрылысына жобалық сметалық құжаттама әзірленді, мультикультураларды қайта өңдеу бойынша автоматтандырылған кешеннің құрылысы аяқталды, № 9 тіректен № 176 тірекке дейін ВЛ-110 кв жоғары вольтты желі (май зауытына) жүргізілді, Восход кентіндегі май экстракциялық зауыттың ағынды суларын тазалау құрылыстарымен су бұру жүйесі салынды.
Водный кентінде Республиканская және Семипалатинская көшелерінің көше жарығына ағымдағы жөндеу жұмыстары жүргізілді, сондай-ақ Восход және Водный кенттерінде су құбыры желілерінің құрылысына жобалық сметалық құжаттама әзірленді.
Ағымдағы жылы Восход кентіндегі 320 орындық балабақшаға және № 34 орта мектепке инженерлік желілер мен қатты отынмен жеке қазандық салуға және «Смычка» су тартқышынан Восход кентіне дейін су құбыры құрылысына, саябақ аймағын орнатуға жобалық сметалық құжаттамалар әзірленеді. Сонымен қатар кенттерде балалар алаңын орнату, жолдарды тегістеу, жөндеу; Шығыс кентіндегі 1200 орындық мектепке және 320 орындық балабақшаға инженерлік желілер, қазандық салу; аталған кенттегі су құбыры желілерін қайта жаңарту және кеңейту; кенттердегі бірқатар көшелерді жарықтандыру бойынша ағымдағы жөндеу жұмыстарын іске асыру жоспарланып отыр.
— 11 наурызда Шығыс кентінде су құбырының құрылысына келісімшарт жасалды. Оның ұзындығы — 36 шақырым, орталық сумен жабдықтауға шамамен 26 көше қосылатын болады. Биыл 9 көше жарықтандырылады, тағы 8 көше 2023 жылы жарықтандырылады. Сондай-ақ жолдарды жөндеу жолдары бойынша жұмыстар жоспарланған. Кент бойынша кварталішілік су құбыры желілерінің құрылысына жобалық сметалық құжаттама сараптамадан өтуде, оны сәуір айының соңында аламыз деп күтілуде.
Сіздер көтерген әрбір мәселе рет-ретімен шешілетін болады. Әр жобаны жүзеге асыру үшін кем дегенде 2 жыл қажет. Бірақ бұл үшін ауызша тілектер ғана емес, сонымен қатар дәлелденген есептері бар нақты әзірленген құжаттар да болуы тиіс, — деді қала басшысы.
Қала әкімі сонымен қатар қоғамдық көлік жұмысын жақсарту үшін шаралар қабылданып, мәселе бақылауға алынғанын да жеткізді.
Бақытжан Байахметов тұрғындардан түскен барлық сұрақтар талданып, жауаптар берілетін, мүмкіндік болса, әкімдік тұрғындардың өтініштері мен тілектерін орындауға әрқашан дайын екенін айтты.
Жиыннан соң қала басшысы азаматтарды жеке мәселелері бойынша қабылдады.
Әзірлеген Анар АХМЕТҚАЛИҚЫЗЫ,
«Семей таңы»
