Семей қаласындағы белгілі кәсіпкер Әсемхан Досқұжанов жас жүзушілерді өз қамқорлығына алды.
Мамыр айының соңында Өскемен қаласында мүмкіндігі шектеулі азаматтар арасында жүзуден облыстық чемпионат аяқталған болатын. Аталған чемпионатқа еліміздің барлық өңірлерінен 40-тан астам спортшы қатысты. Осы сайыста Семей қаласының намысын сегіз жас жүзуші қорғады. Семейлік спортшылар жақсы өнер көрсетіп қана қоймай, сурдо (есту қабілеттері бұзылған спортшылар) және пода (жоғарғы аяқ-қолдары бұзылған; төменгі аяқ-қолдары бұзылған; аралас бұзылулары бар спортшылар) номинациялары бойынша да жүлделі орындарды жеңіп алды.
— Жарыс Өскемен қаласында өтті. Семей қаласынан сегіз адам қатысты. Спортшыларымыз төрт жүлделі орынды жеңіп алды. Жарысқа бір айға жуық дайындалдық. Жаттығулар «Арена» көп салалы спорттық кешенінде өтті. Қарсыластарымыз мықты болды, біз жоспардағының бәрін қолдандық. Жарты жыл жаттығып жүргенімізді ескерсек, бұл біз үшін жақсы көрсеткіш және спортшыларымызды одан ары дамуға ынталандырады. Біраз демалып, келесі жарыстарға дайындықты бастаймыз, – дейді «Семей-Номад» командасының бапкері Ернұр Қайыров.
Спода санатында І орынды Ерік Жанғаскин (дельфин стилінде) жеңіп алды. Ол еркін жүзуден де екінші орынды иеленді. Тағы бір жерлесіміз — Темірлан Айдабол сурдо санатында (арқамен жүзу) қола жүлдені жеңіп алды. Рахат Ардақұлы да сурдо санатында еркін жүзуден қола жүлдені қанжығасына байлады.
Жас жүзушілерді Семей қаласының бизнесмені, AMANAT партиясынан ұсынылған облыстық депутат Әсемхан Досқұжанов өз қамқорлығына алып отыр.
— Мен өзім бизнесмен ретінде осы балаларды қамқорлығыма алдым. Олар физикалық тұрғыда жақсы дамыған, спортпен айналысып, жарыстарға қатысулары керек. Спортшыларымыз чемпионатта лайықты өнер көрсетіп, жеңіске жетті, енді одан ары өздерін дамытады деп ойлаймын. Бұл үшін перспектива бар, облыстық және республикалық деңгейлердегі көптеген жарыстар өтеді. Біз алдағы уақыттарда да балаларға спорттық киімдер сатып алуларына, жарыстарға баруларына қаржылай көмек көрсететін боламыз, — дейді Әсемхан Досқұжанов.
Ерлан АЙҚЫНҰЛЫ,
«Семей таңы»
