Халықты сапалы ауыз сумен қамту — Мемлекет басшысы Қасым-Жомарт Тоқаев белгілеген тапсырмалардың ең негізгілерінің бірі. Бұл тапсырма мүлтіксіз орындалуы қажет. «Денсаулық — зор байлық» дейміз. Денсаулық — әр адамның ғана емес, бүкіл қоғамның баға жетпес құндылығы. Денсаулығымыздың мықты болуы тұтынатын азық-түлігіміздің апасына да тікелей байланысты десек, соның ішінде таза ауыз судың да маңызы зор. Міне, сондықтан да халықты сумен қамтамасыз етудің әлеуметтік маңызы зор.
Тарбағатай ауданында да сумен қамту мәселесіне айрықша көңіл бөлініп келеді. Бүгінгі таңда Өңірлерді дамытудың 2020-2025 жылдарға арналған мемлекеттік бағдарламасы аясында ауданда таза ауыз сумен ауылдық округтерді ғана емес, шалғайдағы шағын елді мекендер мен қыстақтарды да қамтамасыз ету шаралары жүйелі іске асырылуда. Осы бағыттағы оңды істердің арқасында қазірдің өзінде аудан бойынша 60 елді мекеннің 54-і ауыз сумен қамтылды. Бұл — 90,0 пайыздық көрсеткіш. Елді мекендердегі 36 мыңнан астам адам орталықтандырылған ауыз суға қол жеткізіп отыр.
Аудан орталығынан ең шалғайда жатқан Жаңаауыл, Құйған ауылдарындағы су құбыры желілері күрделі жөндеуден өткізілді. Жаңаталап, Жаңалық, Ақжар, Бозша, Жамбыл, Жалаңаш, Қабанбай, Жетіарал, Маңырақ, Ақмектеп, Тұғыл, Байтоғас, Көкжыра, Жәнтікей, Ойшілік, Кіндікті, Қарғыба, Үштөбе, Қызылкесік, Сәтбаев, Құмкөл, Екпін ауылдарында су құбыры желілерін салу және қайта жаңғырту жобасы толығымен іске асырылды. 12 елді мекенге, атап айтқанда Қарой, Тәуке, Асусай, Сарыөлең, Шорға, Шеңгелді, Көкбастау, Тана мырза, Серіктес, Сұлутал, Көктүбек, Қожакелді ауылдарына ұңғыма үстіндегі павильон құрылыстары салынды. Ал Айнабастау, Алғабас, Ақжал, Жолқұрылыс елді мекендеріне блок-модульді станциялар орнатылды.
Аудан орталығы Ақсуат ауылында ауыз су жүйесін орнату жұмыстары былтыр басталған болатын. Бүгінгі күні құрылыс бригадасы көше-көшеге су құбыры желілерін тартуды аяқтады. Енді тұрғын үй иелері «қызыл сызықтан» суды ішке өздері кіргізуге тиіс.
— Халықты ауыз сумен қамту — ең күрделі жұмыстардың бірі. Соған қарамастан, Ақсуаттағы су құбырларына су жіберу қазір рет-ретімен жүргізіліп келеді,- дейді Тарбағатай аудандық тұрғын үй-коммуналдық шаруашылық, жолаушылар көлігі және автокөлік жолдары бөлімінің басшысы Серік Сабырбаев.
Бөлім басшысының «рет-ретімен» дегеніне қарап, су құбырларына су жіберу жұмыстары Ақсуатта ойдағыдай жүргізіліп жатыр деуге келмейді. Неге дейсіз ғой? Ақсуат тұрғындары ауласына («қызыл сызыққа») келіп тұрған су құбырын үйлеріне жеткізіп алуға асығар емес. Мысалы, ауылда жоба бойынша көше-көшеге су құбыры тартылды. Енді құбырды үй ішіне дейін жеткізу жұмысы қалды. Ауылдағы 1448 тұрғын үйге су берілу керек. Осы жоба аясында бар-жоғы 10 үй ғана су құбырын үй ішіне дейін жеткізіпті. Көп пе, аз ба? Бұл, әрине, ойландыратын мәселе. Мемлекет миллиондаған теңге қаржы жұмсап, жаңа су құбырын тартып берсе, оны өз игілігіне пайдалануға асықпаған тірлікті түсіну қиын. Уақыт оздырмай, таза суды өз күшімен қосып алуға ниетті тұрғындар жоқ емес, бар. Ондайларға аз да болса қолдау, көмек қажет сияқты. Көмек дегенде, ұйымдастыру шараларын айтып отырмыз. Ауылдық округтер басшылары тұрғындардың өтініш-тілектеріне қолдау көрсетіп, ақылы болса да құбыр қазуды білетін, техникасы бар мамандарды жұмылдыруы қажет. Өйткені «қызыл сызыққа» дейін келген суға ақсуаттықтардың қолы жетпей тұр.
Хамза СӘТИЕВ,
«Семей таңы»
