«Жол қадірін жүрген біледі» демекші, жол сапасы нашар болса, барар жеріне жеткенше жүргізушінің де, жолаушының да мазасы кететіні анық. Семей қаласында жолдардың сапасына шағымданып, билік басындағыларға арыз-шағымдарын айтып жататын тұрғындар аз емес. Дегенмен соңғы жылдары қажетті қаражат бөлініп, мәселе кезең-кезеңімен шешіліп келеді. Мәселен, жақында жергілікті маңызы бар Семей – Талица автожолының құрылысы аяқталып, қолданысқа берілді.
Автомобиль жолының ашылуына орай, Семей қаласының әкімі Бақытжан Байахметов Талица ауылының тұрғындарымен кездесті.
Аталған жол бөлігінің жалпы ұзындығы 32 шақырымды құрайды. Автомобиль жолы салынғаннан бері ондаған жылдар бойы мұнда жөндеу жұмыстары жүргізілген жоқ.
Жол жөндеу қызметкерлерінің айтуынша, құрылыс кезінде белгілі бір қиындықтар болған. Су тасқыны кезеңі мен жол учаскесінің сортаң болуына байланысты, еріген қар топыраққа терең еніп, онда асфальт негізін сапалы дайындауға мүмкіндік бермейтін, суы бар терең шұңқырлар пайда болды. Бұл мәселені шешу үшін мұндай жерлер терең қазылып, кесек тас араласқан топырақпен толтырылды. Содан соң жол жөндеушілерге негіз толығымен құрғағанша және нығайғанша күтуге тура келді. Қазіргі күні құрылыстың барлық кезеңдері аяқталды, жолға қалыңдығы 5 см және ені 6 метр асфальт төселді.
Автожолдың лентасын ардагер Виктор Дранкин мен жергілікті мектептің белсенді оқушысы Әрсен Мейрамбаев қиды.
— Біз жол жөндеу жұмыстарын көптен бері күттік. Бұл жол біз үшін үлкен маңызға ие. Біз қалаға жиі барамыз, базарға ет немесе көкөністерді сатуға апарамыз. Құрылыстың аяқталуын асыға күттік, — дейді ауыл тұрғыны Әсел Абдибекова.
Кездесуде Семей қаласының әкімі тұрғындарды ауылды абаттандыруға қатысты жоспарлармен таныстырды. Қала басшысының айтуынша, биылғы жылы «Воркаут» элементтері бар балалар ойын алаңын салу жоспарланған. Сондай-ақ жыл соңына дейін Талица ауылының көшелері жарықтандырылатын болады.
— Өмір бір орында тұрмайды. Біз Семейдің шет аймақтарын қолдау үшін кез келген мүмкіндікті қарастырудамыз. Сәуір айында мектептеріңізге физика кабинетіне арналған жабдық сатып алдық. Енді, міне, жақсы жол салынды. Бұл жерлерде көптеген туристік нысандар, шаруа қожалықтары бар. Енді автобустардың қозғалысы жеңілдейді ады, жол жүру уақыты да қысқарады.
Өткен жылдың жазындағы біздің алғашқы кездесуімізде сіздер жолды жөндеп беруді өтіндіңіздер. Сіздердің өтініштеріңіз бен тілектеріңізді орындай алғанымызға қуаныштымын, — деді Бақытжан Байахметов.
Қала әкімі екі жылдан кейін Талица ауылында су құбыры салынатынын айтты. Оның айтуынша, жобалық-сметалық құжаттаманы әзірлеуге шарт жасалған. Сараптама ағымдағы жылдың тамыз айында дайын болады деп күтілуде.
Анар АХМЕТҚАЛИҚЫЗЫ,
«Семей таңы»
