Шығыс Қазақстан облысы бойынша 50 456 оқушы Жазғы мектепте білім алды. Нақтырақ айтқанда, 1 — 4 сыныптардан 18 218 оқушы, 5 — 10 сыныптардан 32238 оқушы сабақтарға қатысқан.
Естеріңізге сала кетейік, 26 мамыр мен 17 маусым аралығында, ҚР БҒМ 2022 жылғы 20 сәуірдегі №159 бұйрығына сәйкес, білім беру ұйымдарында Жазғы мектептер ұйымдастырылған болатын.
Онда 1-8, 10 сыныптағы білім алушылар және 9 сыныпты бітірушілер ерікті, яғни өз қалаулары бойынша оқыған.
«Жазғы мектеп сабақтарының кестесі ҚР БҒМ әдістемелік ұсынымдары бойынша құрылып, оқыту бағдарламалары білім алушылардың пәндік білімдеріндегі олқылықтар ескеріле отырып жасалған. Педагогтер барлық негізгі пәндер бойынша (қазақ тілі, ағылшын тілі, орыс тілі, Қазақстан тарихы, математика, физика, химия, биология, география, информатика) сабақтар жүргізді. Сабақтар оқушылардың жас және психологиялық ерекшеліктерін ескере отырып, заманауи білім беру әдістемелерін, цифрлық білім беру ресурстарын, ойын және АКТ-технологияларын пайдалана отырып ұйымдастырылды, — делінген ШҚО білім басқармасының баспасөз қызметі ақпаратында.
Сондай-ақ, ведомствоның мәліметінше, әр топта 25 оқушыдан артық болған жоқ, облыс бойынша 3691 топқа бөлініп жұмыс жүргізілген. Педагог-шеберлер мен педагог-зерттеушілер ұзақтығы 40 минуттан күніне 3-4 сабақ жүргізген.
Салауатты өмір салтын насихаттау мақсатымен дене шынықтыру пәні мұғалімдері жаттығулар, қозғалмалы қызықты спорт ойындарын, педагог-психологтер мен сынып жетекшілері психологиялық түрлі дамытушы тақырыптар бойынша тренингтер өткізіп, тәрбиешілер мұражайға, табиғатқа саяхат ұйымдастырған, сондай-ақ мектеп кітапханасында кітап оқу акциясы өткізіліпті.
Дана ТАЛҒАТБЕКОВА
«Семей таңы»
