Облыс әкімдігінде коронавирустық инфекцияның таралуының алдын алу шаралары талқыланды.
Қазақстанда КВИ науқастарының саны артып келе жатқаны жасырын емес. 7 шілдеде елде 334 жағдай тіркелді. Алматы қаласы «сары» аймаққа өтті, ал елордада мемлекеттік қызметкерлер маскалық режимге оралды. Семей қаласына келетін болсақ, 2022 жылғы 4 шілдедегі жағдай бойынша, бір пациент өңірлік фтизиопульмонология және оңалту орталығының бөлімшесінде ем қабылдап жатыр. Тағы үшеуі амбулаторияда емделуде. Бұл ретте барлық медициналық мекемелер барынша дайындық режимінде жұмыс істеп жатыр.
Жиында айтылғандай, барлық алғашқы медициналық-санитарлық көмек ұйымдарында «лас» және «таза» аймақтарға бөлу қамтамасыз етілген. Пациенттерді қабылдау тек алдын ала жазылу арқылы жүзеге асырылады. Қолжетімділікті қамтамасыз ету және уақтылы медициналық көмек көрсету мақсатында Семей қаласының амбулаториялық-емханалық ұйымдарында 43 мобильді бригада ұйымдастырылды, оған 50 дәрігер, 72 орта медициналық қызметкер жұмылдырылды. Абай облысының аудандары мен Курчатов қаласында 98 мобильді бригада жұмыс істейді. Олар респираторлық аурулары бар пациенттерді, коронавирустық инфекцияға күдікті адамдарды үйде тексеріп, ПТР-ға талдау алады.
COVID – 19-ға ПТР тестілер бірнеше медициналық ұйымдардың зертханаларында жедел медициналық жәрдем ауруханасында (тәулігіне 540 зерттеуге дейін), № 2 қалалық ауруханада (560 зерттеуге дейін), ҰСО филиалында (450), In-Vitro + (2000-ға дейін) жүргізіледі.
Қалалық денсаулық сақтау ұйымдарының мәліметтері бойынша, бүгінде КВИ науқастарын қабылдау үшін орын жеткілікті. Мысалы, Семей жұқпалы аурулар ауруханасында 70 төсек-орын бар, оның 12–сі — реанимациялық. 2020 жылы 469,4 млн теңгеге жаңа жабдықтар сатылып алынған. КТ аппараты, рентген аппараты және 16 ӨЖЖ аппараты, 216 оттегі баллоны, 341 оттегі магистралі, 5 оттегі станциясы бар. Қазіргі уақытта Семей қаласының қан орталығында пайдалануға дайын иммундық плазманың 808 дозасы сақталуда.
Бірақ сарапшылар қауіпті инфекцияны емдеуден гөрі одан қорғану әлдеқайда тиімді екенін айтады. Сондықтан дәрігерлер КВИ-ге қарсы вакцинацияның толық курсын қайталап алу қажет деп есптейді. Жақын арада облысқа QazVac вакцинасының 18 мың дозасы жеткізіледі. Алайда облыс орталығында да, аудандарында да халық өз денсаулығына немқұрайлы қарап, инфекциядан қорғануға асықпай отыр.
Мамандардың айтуынша, Семейде халықтың тек 19,5 пайызы, яғни 9134 адам ғана қайта ревакцинациядан өткен. Ал аудандарда 14,8 пайыз, яғни 7204 адам ғана екінші қайтара ревакцинация алған. Салыстыра айтатын болсақ, бірінші компанияда 270 003 семейлік, 187 749 аудандардың тұрғындары вакцина салдырған.
Облыс әкімі КВИ-дің жаңа толқынын болдырмау үшін қайта вакцинациялаудың маңыздылығын атап өтті.
— Бұл мәселе тек денсаулық сақтау саласына ғана қатысты емес. КВИ-дің қайта таралуына жол бермеу үшін және аурудың ықтимал өсуіне дайын болу үшін облыстық жұмыс тобын құру қажет. Бүгінгі күні вакцинация — коронавирустың ауыр зардаптарынан қорғанудың жалғыз жолы, — деді Абай облысының әкімі Нұрлан Ұранхаев.
«СТ» — ақпарат
