Абай облысының ауыл шаруашылығы және жер қатынастары басқармасының басшысы Анзор Абаев журналистермен баспасөз конференциясын өткізіп, егін жинау науқанының қорытындылары туралы баяндады.
Зарина КӘП
«Семей таңы»
Жиын барысында облысымыздағы биылғы жиын-теріннің нәтижесі туралы айтылды. Облыстың ауыл шаруашылығы және жер қатынастары басқармасының басшысы Анзор Абаевтың мәлімдеуінше, биыл 742,6 мың гектар алаңнан егін жиналған. Бүгінгі күні дәнді-бұршақты дақылдар, көкөніс-бақша, картоп алқаптарының 100 пайызы және зәйтүн дақылдарының 99 пайызы жиналған.
— Облыстың ауыл шаруашылық тауар өндірушілеріне «Аграрлық несие корпорациясы» АҚ филиалы арқылы несиелеу бағдарламалары аясында егіс және егін жинау жұмыстарын жүргізуге 904,7 млн теңгеден астам несиелік қаражат берілді. 2021 — 2025 жылдарға арналған АӨК инвестициялық жобаларын іске асыру жөніндегі жол картасы бекітілді, оған жалпы көлемі 52,6 млрд теңгеге 28 жоба енгізілді. Жобалар түрлі салалар бойынша 5 негізгі бағыт бойынша, соның ішінде суармалы жерлерді ұлғайту; ет және сүт өндіру; қолданыстағы өндірістерді жаңғырту және малдың гендік қорын жақсарту бойынша іске асырылуда,- деді басқарма басшысы.
Басқарма басшысы мал шаруашылығына да тоқталды, айтуынша, өткен тоғыз айда мал мен құстың барлық түрінен 54,7 мың тонна ет, 402,8 мың тонна сүт және 46,8 млн жұмыртқа өндірілген. Ірі қара мал саны 6,6 пайызға артып, 830 095 мың басты құраған. Облыс бойынша 9 айда жалпы көлемі 365,3 мың тонна сүт өндірілген.
БАҚ өкілдері сүт өнімдерін шығаратын зауыт салу мәселесі туралы сұрады. Қазір облыстың сүт өндірушілері сүтті Шығыс Қазақстан облысындағы зауытқа тасымалдайды. Анзор Абаев Көкпекті ауданында сүт өнімдерін өндіретін зауыт салу жоспарланып отырғанын айтты.
— Жоспарда жүзеге асыратын екі жоба бар. Бүгінде барлық сүт өнімдері «Восток Молоко» компаниясына жіберілуде. Сондықтан алдағы уақытта зауыт салып, сүт тағамдарын өзіміз өндірсек, сатушыға да, сатып алушыға да тиімді болары сөзсіз. Бірақ бұл әзірге жоспар ғана,- деді Анзор Абаев.
Ауыл шаруашылығы басқармасы басшысының айтуынша, алдағы егіс маусымында қант қызылшасы өсіру де қолға алынуы мүмкін. Қазірдің өзінде бірқатар шаруа қожалығы ниет білдіріп отырған көрінеді.
— Қызылша өсіру тиімділігін анықтау үшін талдау-сараптау жұмыстары жүргізілді. Үржар өңірінде қант қызылшасын өсіруге ниет білдіріп отырған бірнеше шаруашылықтар да бар. Бүгінде қызылша өсіруге берілетін субсидиялар көбейгендіктен, жақсы нәтиже береді деген үміттемін, – деді А.Абаев.
