Семей таңы – Семей қаласында техникалық және кәсіптік білім беру саласына тың серпін берген ірі шара өтті. Абай облыстық білім басқармасы мен «TALAP» КЕАҚ-тың қолдауымен Геодезия, картография және құрылыс жоғары колледжінде «Құрылыс өнері – The Art of Building» атты халықаралық құрылыс фестивалі алғаш рет ұйымдастырылды, деп хабарлайды Semeytany.kz тілшісі.
2000-ға жуық адам қамтылды
Фестивальге еліміздің 16 өңірінен 500-ге жуық адам офлайн қатысса, тағы 1200-ден астам қатысушы онлайн режимде қосылып, жалпы 2000-ға жуық адамды қамтыды. Шара барысында техникалық және кәсіптік білім жүйесіндегі жаңа бағыттар, құрылыс саласының болашағы мен жұмысшы мамандықтарының әлеуеті сөз болды.
Мақсат – құрылыс саласында еңбек ететін жұмысшы мамандықтарының мәртебесін көтеру, колледждер арасындағы тәжірибе алмасу мен серіктестікті кеңейту.
Шетелдік сарапшылар бас қосты
Іс-шара аясында ұйымдастырылған форсайт-сессияда Германия, Ресей және Қазақстаннан келген жетекші сарапшылар құрылыс саласындағы заманауи трендтер мен даму жолдарын ортаға салды. Сонымен қатар, «Хай-тек стиліндегі үй» халықаралық байқауының жеңімпаздары марапатталды.
WorldSkills Kazakhstan ұлттық чемпионатының бас сарапшылары да арнайы келіп, құрылыс мамандықтары бойынша шеберлік сабақтар өткізді.
Екі күндік кәсіби байқау өтуде
Фестиваль аясында республикалық кәсіби шеберлік конкурсы да ұйымдастырылып жатыр. Қатысушылар үш түрлі құзыреттілік бойынша бақ сынап, педагогикалық және кәсіби машықтарын көрсетеді. Байқау екі күнге созылады, ал марапаттау рәсімі 30 мамыр күні өтеді.
Құрылыс саласының болашағы – жастардың қолында
Шараға құрылыс индустриясы өкілдері, колледж оқытушылары, әлеуметтік серіктестер мен кәсіпкерлер қатысты. Бұл фестиваль — құрылыс саласындағы білім беру жүйесінің әлеуетін арттырып, жастарды кәсіпке баулуға бағытталған маңызды басқосу ретінде бағаланып отыр.
Ерлан Айұынұлы
