Semeytany.kz — Семей қаласының орталық алаңында жаңажылдық бас шыршаның шамын жағу рәсімі өтті. Салтанатты шараға Абай облысының әкімі Берік Уәли қатысып, тұрғындарды алдағы Жаңа жыл мерекесімен құттықтады. Мерекелік кешке халықаралық, республикалық олимпиадалар мен спорттық сайыстардың, робототехника жарыстарының жеңімпаздары мен жүлдегерлері де арнайы шақырылды.
Аймақ басшысы құттықтау сөзінде Жаңа жылдың әр шаңырақ үшін мәні бөлек екенін атап өтіп, өңір үшін өтіп бара жатқан 2025 жылдың нәтижелі болғанын айтты. Сонымен қатар келер жылы да облыстың дамуын жалғастырып, жаңа жобаларды іске асыру, әр отбасыға жайлы, әр балаға қауіпсіз, әр азаматқа мүмкіндік беретін аймақ құру бағытындағы жұмыс күшейетінін жеткізді.
Жаңа жыл қарсаңында қала тұрғындарына мерекелік көңіл-күй сыйлау мақсатында орталық алаңдағы Арбат бойы жұлдызды аспан шамдарымен безендірілген. Бұл жұмыстар демеушілердің қаражаты есебінен жүзеге асқан. Сондай-ақ шаһардың әр ауданында 40-тан астам шағын сәулеттік пішіндер орнатылып, мемлекеттік және жекеменшік ғимараттар аймағы түрлі түсті жарықтармен әшекейленді.
Облыста биыл әлеуметтік маңызы бар нысандар бой көтеріп, жолдар жөнделіп, елді мекендердің инфрақұрылымын жақсартуға бағытталған жұмыстар жүргізілгені айтылды. Білім беру, денсаулық сақтау, мәдениет пен спорт салаларында атқарылған істер тұрғындардың тұрмыс сапасын арттыруға негіз болған.
Шара соңында эстрада жұлдыздары Әйгерім Қалаубаева мен Әділет Жауғашар және жергілікті өнерпаздар концерттік бағдарлама ұсынып, көпшілікке мерекелік көңіл-күй сыйлады.
