Елбасы ұсынған «5 институционалды реформаны жүзеге асырудағы 100 нақты қадам» саяси жоспарын талқылау мақсатында өткен аптада әкімдіктің кіші залында арнайы жиын өтті. Жиынға қалалық ішкі саясат бөлімінің басшысы Айдар Садырбаев, қала әкімі аппаратының мемлекеттік-құқықтық жұмыстар бөлімінің басшысы Сержан Әзбергенов, Семей қаласы № 2 сотының судьясы Жанат Әбенова және мемлекеттік қызметкерлер мен сот саласының қызметкерлері қатысты.
{jcomments on}Алқалы кездесудің басты тақырыбы стратегиялық құжаттың 1-2 тарауында белгіленген кәсіби мемлекеттік аппаратты құру мен заңның үстемдігін қамтамасыз ету жөнінде болды. Қала әкімі аппаратының мемлекеттік-құқықтық жұмыстар бөлімінің басшысы Сержан Әзбергенов келтіргендей, Ұлт Жоспарының алғашқы 15 қадамында, мемлекеттік қызметкерлер корпусын кәсіби әрі автономиялы етуге басымдылық берілген. Яғни алдағы уақытта мемлекеттік қызметке қабылдау рәсімі жаңғырып, үміткерлер өз жұмыстарын төменгі сатыдан бастайтын болады.
— Лауазымды орынға алғаш рет қабылданған тұлғалар міндетті түрде сынақ мерзімінен өтетін болады. Дей тұрғанмен жоғары біліктілігін дәлелдей білген азаматтарға, тиісті еңбекақысынан бөлек, қосымша бонустар беріледі деп көзделіп отыр. Бұл өз кезегінде қызметкерлердің жауапкершілігі мен жұмыстарының қарқынын үдете түсуіне септігін тигізеді. Қазіргі сәтте соған орай тиісті заң жобасы әзірленіп жатыр, — деп атап өтті С.Әзбергенов.
Сондай-ақ ҚР Мемлекеттік қызмет туралы Заңына сәйкес, қызметкерлердің жалақасына балдық бағалау жүйесі енгізіледі деп жоспарлануда. Яки лайықты атқарылған еңбегіне сай, білікті маман қосымша нәпақаға ие болады. Алайда бонустар көрсеткіші еңбекақы көлемінің 30 пайызынан артық болмауы тиіс. Бұдан бөлек, 3-қадамда көрсетілгендей, ҚР Мемлекеттік қызмет және жемқорлыққа қарсы іс-қимыл агенттігінің рөлі арта түсетін болады. Оған сәйкес, мемлекеттік жұмысқа қабылданатын азаматтар агенттіктің үш сатылы іріктеу сүзгісінен өтуі шарт. Сонымен қатар басқосуда ұлт болашағын айқындайтын реформаның 2-тарауы талқыға түсті. Оның түпкі мақсаты заңның үстемдігін қамтамасыз ету болып табылады. Бұл бағытта тәртіп сақшыларының қызметі мен кәсіби әрі дербес сот саласын дамыту жоспарланып отыр. Осы ретте Семей қаласы № 2 сотының судьясы Ж.Әбенова азаматтардың сот төрелігіне қолжетімділігін арттыру үшін сот жүйесі инстанциялары оңтайланатындығын баяндады. Нақтырақ айтқанда, бес сатылы сот жүйесінен үш деңгейлі төрелік тетігіне көшу жолдары қарастырылмақ. Бұдан өзге судья лауазымына үміткерлер сарапталып, біліктілік талаптары күшейтілетін болады. Енді судья қызметіне тағайындалу үшін сынға түсетін азаматтардың 5 жылдық жұмыс тәжірибесі болуы міндет екенін атап өтті Жанат Тілеубайқызы.
Жақсылық МҰРАТҚАЛИ,
«Семей таңы»
