Жаңа жылдан бастап электр жарығының бағасы қымбаттайды. Бұл жайында Семей қаласында электр энергиясын сату тарифтеріне арналған қоғамдық тыңдауда мәлім болды. Шығыс Қазақстан облысын электр энергиясымен қамтамасыз ететін «Шығысэнерготрейд» ЖШС енді бұл қызметтің құнын 5,51 пайызға арттырмақ. Биылғы жылы жетінші рет өткізіліп отырған қоғамдық тыңдау отырысына «Шығысэнерготрейд» ЖШС директорының орынбасары Мстислав Мартемьянов, үкіметтік емес ұйым өкілдері, қоғам белсенділері және БАҚ өкілдері қатысты.
Қоғамдық тыңдауда сөз алған «Шығысэнерготрейд» ЖШС директорының орынбасары Мстислав Мартемьянов электр жарығын тасымалдаушы компанияның 2017 жылдың 1 қаңтарынан бастап тарифті өсіруді көздеп отырғанын атап өтті.
– Электр қуатының тарифін мәжбүрлі түрде көтеріп отырмыз. Кәсіпорынның тұрақты жұмыс жасап, әрбір тұрғынға электр қуатын жеткізуі үшін жарық құнын көтеруге мәжбүрміз. Басты себеп – «КЕGОК» АҚ сынды электр қуатын жеткізуші компаниялар тарифті өсіріп отыр,- деген компания өкілі бұл жолғы қоғамдық тыңдаудың өткен жиындарға қарағанда өзгергенін, атап айтқанда, еліміздегі жаңа Кәсіпкерлік кодексіне байланысты тарифті белгілеп, бекіту кәсіпкерлердің өз еркіне берілгенін атап өтті. Яғни, ендігі уақытта тасымалдаушы компания Табиғи монополияларды реттеу және бәсекелестікті қорғау комитетінің бекітуінсіз-ақ тарифті белгілей алады екен. Ал өкілетті орган (Табиғи монополияларды реттеу және бәсекелестікті қорғау комитеті) тариф бекітілгеннен кейін, қажет деп тапса, тексеріс жүргізіп, заңсыздық орын алған жағдайда ғана айыппұл сала алады.
Сонымен, 2017 жылдың 1 қаңтарынан бастап электр энергиясының алдағы уақыттағы орташа тарифі 1 кВт электр қуаты үшін 11,106 теңгені құрамақ. Яғни, бұл 5,51 пайыз өсімді құрап отыр. Айта кетуіміз керек, ағымдағы жылы электр тасымалдаушы мекеме электр қуатын қымбаттатуды сұрап, алты рет қоғамдық тыңдау өткізген. Бұл жиындарда электр энергиясын жеткізуші компания жұмысына бірқатар сын пікірлер де айтылған болатын. Бұл жолғы жетінші қоғамдық тыңдау да сын-ескертпелерсіз өткен жоқ.
Әсіресе қоғам белсенділері электр жарығын тасымалдаушы компанияның ресми сайтында, қоғамдық тыңдау өткізілместен, тарифтің өсетіні туралы ақпараттың жарияланғанына наразылықтарын білдірді. Ал энергетиктер, жаңа Кәсіпкерлер кодексіне сай, тарифті көтеру компанияның өз еркіне берілгенін тағы бір мәрте атап өтті.
Қоғамдық тыңдауда «Шығысэнерготрейд» ЖШС директорының орынбасары Мстислав Мартемьянов жарықтың көтерілуінің басты себебін электр энергиясын жеткізуші компаниялармен байланыстырды.
Айталық, электр қуатының қымбаттауын «КЕGОК» АҚ, ШҚ АЭК және «Казцинк Энерго» ЖШС сынды ірі мекемелермен байланыстырған энергетиктер аталған мекемелердің қазірден электр энергиясын көтергенін атап өтті. Мәселен, «КЕGОК» АҚ тарифті өсіруді алдағы бес жылға бекітіп қойған екен. Осы жайт қоғамдық тыңдауға қатысқандардың наразылығын туғызды. Белсенділер, егер «КЕGОК» АҚ тарифті көтеруді заңды түрде бекітіп алған болса, «Шығысэнерготрейд» ЖШС тарапынан өткізіліп отырған қоғамдық тыңдаудың бос әурешілік екенін айтты. Осы ретте жиналғандар халық қалаулыларына сауал жолдап, мәселені заң жүзінде ретке келтіру керектігін де ұмыт қалдырмады.
Осылайша, жыл бойы қоғамдық тыңдауларда талқыға салынған электр энергиясының тарифі нақтыланды. Оның үстіне монополистер құзырлы органның шешімінсіз-ақ тариф құнын өз беттерінше белгілей алатын болып отыр.
Электр жарығы үшін бағаны көтермек болып отырған энергетиктер алдағы уақытта да тарифті өзгертулері бек мүмкін.
Асан МЫРЗАХАН,
«Семей таңы»
