25 қыркүйек, сәрсенбі күні Қазақстанның халық артисі, Мемлекеттік сыйлықтың иегері, көрнекті театр және кино актрисасы Әмина Өмірзақованың 100 жылдығына арналған XXVII Республикалық театр фестивалінің жабылу салтанаты өтті.
Аталмыш шараны ҚР Мәдениет және спорт министрлігінің, Шығыс Қазақстан облысы әкімдігінің қолдауымен Қазақстан театрлары ассоциациясы ұйымдастырған болатын. Апта бойы республикамыздағы ең үздік 12 театр ұжымы өз қойылымдарын сахналап, семейлік көрерменнің ықыласына бөленді.
Фестиваль қорытындысында өнерпаздар мен өнер ұжымдары 13 аталым бойынша және ШҚО әкімінің арнайы жүлдесімен марапатталды.
Салтанатты жиында құттықтау лебізін білдірген Шығыс Қазақстан облысы аппаратының басшысы Азамат Маратұлы ШҚО облысы әкімі атынан әділ қазылар алқасына құрмет көрсетіп, арнайы сыйлықтар табыс етті.
– Ұлы даланың ұлы есіміне айналған жерлесіміз Әмина анамыздың 100 жылдығына орай ұйымдастырылған фестивальға келген Асанәлі Әшімов ағамызға, барша өнер майталмандарына зор алғыс білдіремін. Әрдайым елге қызмет етіп, тек өнердің биігінен көрінулеріңізге тілектеспін, – деді ол көрермен алдындағы сөзінде.
Осыдан соң жеңімпаздарға құрмет көрсетуге кезек берілді. Бұл ретте «Үздік көркемдік шешім» номинациясы бойынша Ф.М.Достоевский атындағы орыс драма театры «Періште» спектаклі үшін,«Үздік режиссура» номинациясы бойынша «Жан дауысы» спектаклі үшін Фархат Молдағали, «Әмина Өмірзақова атындағы «Ең үздік әйел бейнесі» номинациясы бойынша «Ләйлі-Мәжнүн» спектакліндегі Ләйлінің анасы және кемпір рөлдері үшін Ботагөз Мақсұтова, «Үздік ер адам бейнесі» номинациясы бойынша «Әлиханның аманаты» спектакліндегі Әлихан рөлі үшін Медғат Өмірәлиев, «Қазақстанның театр өнеріне қосқан үлесі үшін» номинациясы бойынша «Абай»
Спектакліндегі «Абай» рөлі үшін Бақытбек Темірбеков марапатталды.
Бір бұл емес, үздіктер қатарында «Үздік актерлік ансамбль» номинациясы бойынша М.Горький атындағы Мемлекеттік академиялық орыс драма театры «Евгений Онегин» спектаклі, «Тарихи тақырыпты игерудегі ізденістері үшін» номинациясы бойынша Абай атындағы қазақ музыкалық драма театры «Ахметтің аманаты» спектаклі, «Ең үздік екінші пландағы ер адам бейнесі» номинациясы бойынша «Қанды азу» спектакліндегі «Бораш» рөлі үшін Елдос Масалимов, «Ең үздік екінші пландағы әйел адам бейнесі» номинациясы бойынша «Театр 180º» спектакліндегі Дотти рөлі үшін Гүлмира Жакилина, «Үміт» номинациясы бойынша «Балалық шаққа саяхат» спектаклінің режиссері Жангелді Садықов, «Шығармашылық жетістіктері үшін» номинациясы бойынша «Дауыс. Дау іс» спектаклі үшін «Дариға-ай» жастар театры марапатталды.
Ал «Ең үздік спектакль» номинациясы Ғ.Мүсірепов атындағы қазақ мемлекеттік академиялық балалар мен жасөспірімдер театрына «Адам-зат» спектаклі үшін берілді. Жүлде қоры 1,500 000 теңгені құрайды. Мұнымен қатар Шығыс Қазақстан облысы әкімінің 1,000 000 теңгені құрайтын жүлдесі «Дариға-ай» жастар театрына берілді.
Жеңімпаз атанған барша өнер иелерін осынау фестивальдағы шығармашылық жетістіктерімен біз де құттықтаймыз!
{jcomments off}
