Өткен аптаның бейсенбісі, 30 қаңтар күні қалалық ақпараттық орталықта «Тұрғын үй құрылыс жинақ банкі» АҚ Семей қалалық филиалы басшысының орынбасары Ләззат Нұрханованың, ТҮКШ бөлімі басшысының орынбасары Диана Шаяхметованың және архитектура және қала құрылысы бөлімі басшысының міндетін атқарушы Ардақ Исатаевтың қатысуымен баспасөз конференциясы өтті.
Конференцияда 2019 жылы мемлекеттік «Нұрлы жер» және банктің «Өз үйім» бағдарламаларының жүзеге асуы туралы қорытынды шығарылып, биылғы жылдың жоспарлары жайлы айтылды.
«Тұрғын үй құрылыс жинақ банкі» АҚ Семей қалалық филиалы басшысының орынбасары Ләззат Нұрханованың сөзінше, өткен жылы «Нұрлы жер» мемлекеттік тұрғын үй бағдарламасы арқылы 348 отбасы, «Нұрлы жер» – «Байтерек Девелопмент» АҚ бағытымен несиелік тұрғын үй бағдарла-масы бойынша 146 отбасы, банктің «Өз үйім» жеке бағдарламасы бойынша 141 салымшы баспаналы болса, 1 141 отбасы екінші дәрежелі тұрғын үйлерге қол жеткізген.
– 2019 жылы көпбалалы және аз қамтылған отбасыларға арналған «Бақытты отбасы» және әскери қызметкерлерге арналған «Әскери баспана» бағдарламасы іске қосылған болатын. 88 семейлік «Бақытты отбасы» бағдарламасы арқылы тұрғын үймен қамтылса, «Әскери баспана» бағдарламасы аясында 346 әскери қызметкер баспана мәселесін шешті. Аталған екі бағдарлама биылғы жылдың көктемінде, несиеге қажетті қаражаттың түсуіне қарай жалғасады деп күтілуде,- деді Л.Нұрханова.
Жалпы, бүгінде банктің Семей қаласындағы филиалындағы салымшылар саны 49 920 адамға жеткен. Тек жыл басынан бері ғана 1 249 адам депозит ашқан. Яғни бүгінде әрбір алтыншы семейлік банк арқылы баспана алуды жоспарлауда. Осылайша, 2019 жылы банктің Семейдегі филиалының депозиттік портфелі 20,5 млрд теңгені құраған.
– 2020 жылы Тұрғын үй құрылыс жинақ банкінің Семей қалалық филиалы 720 пәтер, оның ішінде мемлекеттік бағдарлама арқылы 612 және меншікті бағдарламалары шеңберінде 96 пәтер сатуды жоспарлап отыр. Осы орайда салымшылардың естеріне сала кететін жайт, 2020 жылдан бастап Тұрғын үй құрылыс жинақ банкі арқылы «Нұрлы жер» мемлекеттік бағдарламасына қатысушылар жеңілдетілген несиені өзгертілген шарттар бойынша ала алады. Енді аталмыш бағдарлама арқылы баспана кезегінде тұрғандардың санаты емес, табыс мөлшері басты рөл атқарады, – деді Л.Нұрханова.
Осылайша, егер тұрғын үй кезегіндегі отбасының әрбір мүшесіне келетін табыс мөлшері бір күнкөріс минимумынан кем болса ( 31 183 теңге), онда олар үшін пәтерлер сатып алу құқығынсыз жалға берілетін болады. Олардың қатарына халықтың әлеуметтік әлсіз топтары жатады. Егер баспана кезегінде тұрған қазақстандықтардың табысы екі күнкөріс минимумына жететін болса (62 366), онда тұрғын үй бағасының 10%-ын жинағандар үшін Тұрғын үй құрылыс жинақ банкі жылдық 2% мөлшерлемемен несие береді. Несие «Бақытты отбасы» бағдарламасы бойынша ұсынылады. Оған көпбалалы және толық емес, сондай-ақ мүмкіндігі шектеулі балаларды тәрбиелеп отырған отбасылар қатыса алады.
Отбасының әрбір мүшесіне есептегенде табыс мөлшері 3,1 күнкөріс минимумынан (96667) аспайтын азаматтар «5-20-25» шарттары бойынша несиелік тұрғын үй ала алады. Аталған бағыт бойынша баспанаға қол жеткізу үшін міндетті түрде жергілікті атқарушы органдарда кезекте тұру қажет. Сонымен қатар Тұрғын үй құрылыс жинақ банкіндегі шотта кем дегенде 20 % көлемінде бастапқы жарна болуы керек.
Ал табыс мөлшері 3,1 күнкөріс минимумынан асатын азаматтар Тұрғын үй құрылыс жинақ банкінің бағдарламалары арқылы баспана ала алады. Айта кету керек, банк бағдарламаларын табыс деңгейіне қарамастан кез келген азамат пайдалана алады. Аталған жүйе жылдық 3,5-8,5% мөлшерлемемен тұрғын үйді несиеге алу мүмкіндігін ұсынады.
ТҮКШ бөлімі басшысының орынбасары Диана Шаяхметованың айтуынша,бүгінде Семей өңірі бойынша 10 901 отбасы мемлекеттік тұрғын үй қорынан баспана алуға кезекте тұр. 216 отбасы 2019 жылы мемлекеттік тұрғын үй қоры арқылы баспанамен қамтылған. Оның ішінде 103-і- көп балалы отбасы, 27-сі – жетім балалар, 86-сы – әлеуметтік жағынан аз қамтылғандар, толық емес отбасылар, мүгедек бала тәрбиелеп отырған жанұялар, І және ІІ топтағы мүгедектер, зейнеткерлер. Сонымен қатар бюджеттік салада істейтін 32 қызметкерге тұрғын үй берілген. Оның 15-і дәрігерлер болса, қалғандары құқық қорғау органдарының қызметкерлері.
Жадыра ТӨЛЕГЕНҚЫЗЫ, «Семей таңы»{jcomments off}
