Семей қаласында жаңадан сауда көтерме-тарату орталығы ашылды. Аталған орталықта алдағы уақыттарда жәрмеңкелер өткізіліп, халыққа арзан бағадағы азық-түлік ұсынылатын болады. Ең маңыздысы, жаңа нысанда сыйымдылығы 350 тонна болатын, яғни үлкен көлемдегі ауылшаруашылық өнімдерін сақтайтын заманауи жабдықталған қоймалар бар.
Орталық бірден бірқатар экономикалық мәселелерді шешуге ықпал етеді, яғни азық-түлік қауіпсіздігін қамтамасыз етуге, ауылшаруашылық өнімдерінің бағасын тұрақтандыруға, сонымен қатар шаруа қожалықтары мен түпкілікті сатып алушы арасындағы делдалдардың санын айтарлықтай қысқартуға септігін тигізеді. Жобаны «Ақшын корпорациясы» ЖШС-нің еншілес кәсіпорны «Jolaman TLC» ЖШС жүзеге асырды.
Қала іргесіндегі «Jolaman» жаңа көтерме сауда-тарату орталығының ашылуына шаһарымыздағы белді кәсіпкерлер, орта бизнес өкілдері мен қала әкімі Бақытжан Байахметов және БАҚ өкілдері қатысты.
Көтерме-тарату орталығының ашылуында қала әкімі Бақытжан Кәкенқажыұлы құттықтау лебізін білдіріп, пайдалануға беріліп отырған жаңа нысанның маңыздылығын атап өтті.
Салтанатты шарада «Ақшың» корпорациясының президенті Марат Құрманбаев алдағы жоспарлары туралы айтып берді.
— Алдымызда сауда туризмін дамыту міндеті тұр. Біз өткенді ұмытпай, болашақ туралы да ойлаймыз. Мәселен, болашақта сауда мұражайын ұйымдастыруға болады. Бұл орталықтың ашылуына атсалысқандардың барлығына – министрлікке, банктерге, облыс және қала әкімдіктеріне алғысымызды білдіреміз, — деді Марат Құрманбаев.
Көпшілік алдында Қазақстанның сауда кәсіпорындары қауымдастығының басшысы Жібек Әжібаева да сөз сөйледі. Ол аталмыш орталықтың мүмкіндігінің зор екенін айтып өтіп, алдағы жоспарларына тоқталды.
Салтанатты жиында қала әкімі Бақытжан Байахметов маңызды жобаны сәтті жүзеге асырған кәсіпкер Марат Серікжанұлының өңіріне Қазақстан Республикасы Ауыл шаруашылығы министрлігінің «Ауыл шаруашылығы саласының үздігі» төсбелгісін тақты, сонымен қатар кәсіпкерлік саладағы көп жылғы адал еңбегі, аймағымыздың әлеуметтік-экономикалық дамуына қосқан аса зор үлесі үшін және 60 жас мерейтойына орай Құрмет грамотасын табыс етті.
Айта кетейік, көтерме-тарату орталығының жалпы ауданы 11 гектарды құрайды. Нысан қаланың Жоламан кентіндегі бұрынғы «Сары» базарының орнында бой көтерді. Аталмыш жер аумағын «Ақшың» корпорациясы сатып алып, жаңа сауда орталығының жобалық-сметалық құжаттамасын әзірлеген болатын.
Орталықтың құрылысына компания өз есебінен 1,5 миллиард теңге қаржы салған болатын. Тағы 473 миллион теңге «Даму» қорының қолдауымен «ЦентрКредит» банкінен несие түрінде алынған екен.
Қазіргі уақытта 5 мың тоннадан астам картоп пен көкөністі қоса алғанда, 8,5 мың тонна өнімге арналған көтерме-тарату қоймасы және құрғақ өнім түрлеріне (қант, ұн, жарма және т.б.) арналған 3,5 мың тонна құрғақ қойма дайын.
Орталықта көкөніс түрлерін сақтауға арналған көтерме-тарату қоймалары, кросс-док, тоңазытқыш пен мұздатқыш камералары бар. Алдағы уақыттарда нысанның екінші қабатында ауылшаруашылық өнімдерінің жәрмеңкесін ұйымдастыру да жоспарлануда.
Облысымыздағы заманауи құрал-жабдықтармен қамтамасыз етілген алғашқы көтерме-тарату орталығының іске қосылуы аймағымыздағы ішкі сауданың дамуына игі әсерін тигізіп, шаруаларға өз өнімдерін өткізуге, тұрғындарды сапалы өніммен қамтамасыз етуге мүмкіндік береді деген сенімдеміз.
«СТ» — ақпарат