«Бір қабатты Шығыс»
Өңірімізде сәтті жүзеге асырылып, тұрғындардың жоғары қызығушылығына ие болған «Бір қабатты Шығыс» бағдарламасы шеңберінде жеке тұрғын үй құрылысы алдағы уақытта қарқын алуы тиіс. Облыс әкімі өткізген кеңесте тұрғын үй құрылысына қатысты бірқатар өзекті мәселелер қаралды.
– Мысалы, Өскеменде ғана 6000-нан астам адам өз үйлерінде тұруға немесе оны салуға дайын. Біз өз тарапымыздан тұрғындардың уақыт пен ақша үнемдеу мақсатында инженерлік инфрақұрылымы жүргізілген учаскелерді ұсынамыз. Осы ретте құрылыс басқармасы жылу желілерінің жағдайын талдап, қуаттылықты қай жерде арттыру керектігін анықтауы керек.
Өскемен мен Семей қалалары әкімдері бір апта мерзімде үй құрылысына тиімді учаскелерге бөлінген жобаларды әзірлеуі керек. Өйткені құрылыс маусымы басталған кезде, яғни сәуір-мамыр айларында барлығы дайын болуы тиіс, – деп атап өтті өз сөзінде аймақ басшысы Даниал Ахметов.
Сондай-ақ, облыс басшысының айтуынша, бос учаскелерді жеке тұрғын үй құрылысына пайдалану үшін қандай жұмыстар жүргізу керектігін шешу қажет. Аталмыш бағдарламаны іске асыруда Семей, Зайсан және Аягөз қалалары жақсы көрсеткішке ие. «Бір қабатты Шығыс» бағдарламасына облысқа қарасты барлық қалалар мен аудандар толықтай қатысуы керек, сол кезде ғана тұрғын үй мәселесі шешімін тауып, ойдағыдай нәтиже береді. Ал осы мақсатқа жету үшін барлық елді мекендер бойынша ақпарат жинақталып, жер телімдерінде тұрғындар қолайлығы үшін коммуникация желілері тартылуы шарт.
Азамат ЕРСАЙЫН,
«Семей таңы»
