СЕРГЕКТІҢ СЕПТІГІ КӨП БОЛЫП ТҰР
Шығыс Қазақстан облысында бір жылда көлік жүргізушілеріне «Сергек» камералары арқылы 3,5 млрд теңге айыппұл салынды.
Бұл жайлы халық алдында есеп берген ШҚО полиция департаментінің бастығы Серік Жүнісбеков мәлімдеді.
«Құқық бұзушылықтарға «нөлдік төзімділік» қағидатын қамтамасыз ету бағытында белсенді жұмыс жүргізілуде. Өткен жылы облыс бойынша 470 733 адам әкімшілік жауапкершілікке тартылған. Оның ішінде «Сергек» аппараттық бағдарламалық кешенінің көмегімен 137 158 құқық бұзушылық анықталды. Жүргізушілерге жалпы сомасы 3 млрд 500 млн теңгеден астам айыппұл салынды», — деді ол.
Бір жыл ішінде тәртіп сақшылары 2000-ға жуық мас күйінде көлік басқарған жүргізушіні ұстады. Ал 1442 адам жолдың қарсы бағытына шыққаны үшін жауапқа тартылған.
Айта кетерлігі, ағымдағы жылы «Сергек» камераларының санын арттыру көзделуде. Бұл шара әсіресе, жол-көлік қозғалысы жиі бұзылатын Семей қаласында тұңғыш рет қолға алынғалы отыр.
Бақылаудың бұл түрі тек жол апаттарының ғана алдын алып қоймай, түрлі құқық бұзушылық пен қоғамдық тәртіпсіздіктің ашылуына да септігін тигізеді. Бұл орайда облыс көлемінде жыл басынан бері нәтижелі жұмыстар жүргізілуде.
Өз тілшіміз
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
