СЕМЕЙДЕ ВОЛЕЙБОЛДАН АЗИЯ ЧЕМПИОНАТЫ ӨТУДЕ
Волейболдан әйелдер командалары арасында клубтық Азия чемпионаты 24 сәуір күні басталды. Ашылу салтанаты мен алғашқы ойын Қарағайлы шағын ауданының “Арена» көпфункционалды мәдени-спорт кешенінде өтті. Чемпионатқа Қазақстан, Қырғызстан, Өзбекстан, Иран және Тайланд елдерінен жалпы жиыны бес команда қатысуда.
Чемпионат қарсаңында команда өкілдері баспасөз конференциясына қатысып, ауқымды турнирге дайындықтары жөнінде толығырақ айтып берді.
Команда өкілдері спортшылардың турнирге мұқият дайындалғандарын ерекше атап өтті.
– Біз чемпионатқа дайынбыз деп айта аламыз. Барлық ойыншылар жақсы қалыпта, – деді қазақстандық «Қуаныш» клубының бас бапкері Дарко Добресков.
Шетелдік спортшылар ұйымдастырушыларға осы жарысқа шақырғандары үшін алғыстарын білдірді.
– Ұйымдастырушыларға шақырғандары үшін алғыс айтқым келеді. «Арена» өте әдемі екен. Менің ойымша, қала әлі де дамитын болады. Себебі спорт адамдарды біріктіреді және қаланың дамуы осы спорттан басталады, – дейді Қырғызстан командасының бас бапкері Абдухамид Айсаходжиев.
Турнирді ШҚО бойынша дене шынықтыру және спорт басқармасының қолдауымен Қазақстан Республикасының Волейбол федерациясы мен жергілікті «Алтай» волейбол клубы бірлесіп ұйымдастырды. Мұндай ауқымды спорттық шара бізде алғаш рет ұйымдастырылып отырғанын айта кеткен жөн.
Бірінші ойын Тайланд пен Өзбекстан командалары арасында өтті. Одан кейін қазақстандық «Алтай» және «Қуаныш»командалары өзара сынға түсті. Ал Қырғызстан мен Иран командаларының ойыны жарыс күнін қорытындылады.
Айта кетерлігі, Семейде өтіп жатқан Азия чемпионаты туралы облыс әкімі Даниал Ахметов те өзінің фейсбук әлеуметтік желісіндегі жеке парақшасында пікір білдірді.
– Семейде әйелдер командалары арасында волейболдан клубтық Азия чемпионатын ашу мен үшін үлкен мәртебе болды. Осымен үшінші рет Шығыс Қазақстан әлемдік деңгейдегі спорттық шараны қабылдап отыр. Ұзаққа созылған пандемиядан кейін мұндай жарыстар спортшылар мен жанкүйерлер үшін өте қажет. Аталмыш чемпионатқа бес ел қатысты. Ол – Қазақстан (2 команда – шығысқазақстандық «Алтай» мен СҚО-ның «Қуаныш» командасы), Қырғызстан, Өзбекстан, Таиланд және Иран. Әр клубтың өз тарихы бар, бірақ біздің елден волейбол алаңына екі команданың шығуы қуантады, олардың арасында өткен маусымның көшбасшысы – «Алтай». Азия Волейбол федерациясына чемпионатты өткізу кезінде сенім білдіргені үшін алғысымды білдіремін, – деп жазды облыс әкімі.
Сөз соңында айта кетелік, клубтық чемпионат 30 сәуірде аяқталады. Чемпионатқа кіру тегін.
Семей қаласы ақпараттық орталығы
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
