ӨНЕРДІҢ ҚАРА ШАҢЫРАҒЫ ҚАРТ СЕМЕЙДЕ
Апта сейсенбісі, 10 мамыр күні Абай атындағы мемлекеттік қазақ — музыкалық драма театрында Мұхтар Әуезовтің 125 жылдығына орай Семей қаласына гастрольдік сапармен келген Мұхтар Әуезов атындағы Қазақ ұлттық драма театры баспасөз конференциясын өткізді.
Конференцияға Мұхтар Әуезов атындағы қазақ ұлттық драма театрының директоры, Қазақстанның еңбек сіңірген қайраткері Еркін Жуасбек, аталмыш театрдың актері, өнер жұлдызы Бекжан Тұрыс, сондай-ақ актриса Шынар Жанысбекова және семейлік жұртшылыққа ұсынылған “Абайдың жұмбағы” спектаклін сахналаған театрдың жас режиссері Әридаш Оспанбаева қатысты.
Өнер ұжымы Абай театрында 10-12 мамыр күндері үздік спектакльдерін сахналайды. Бұл жөнінде Мұхтар Әуезов атындағы Қазақ ұлттық драма театрының директоры Еркін Жуасбек баяндады.
— Биылғы жыл жақсы жаңалықтарға толы болып отыр. Оның бірі Мұхтар Әуезовтің 125 жылдық мерейтойы болса, екіншісі — қасиетті мекен Семейдің Абай облысының орталығы болады деген шешімнің қабылдануы. Осыған орай, театрымыз Семейге арнайы келіп, көрермендерін үш күн бойы үздік қойылымдарымен қуантпақ. Соның бірі — театр режиссері Әридаш Оспанбаева қойған “Абайдың жұмбағы” спектаклі. Ұлы ақынның өзінің әлеуметтік ортасынан ерекшеленуінің, үнемі даму-кемелдену жолында болуы тиіс Адам атты ұлы құбылысты зерттеу-тану жолында “толық адам” ілімін ашуының, осылайша, хакімдік деңгейге жетуінің жұмбағы неде? Бұл күрделі сауалдарға Абайдың өз шығармашылығына және М. Әуезовтің атақты “Абай жолы” эпопеясының оқиғаларына сүйене отырып, өз тарапынан жауап іздейтін қойылым көрерменін де осы бір күрделі сауал төңірегінде ой серіктестікке шақырады. Одан бөлек, 11 мамыр күні жазушы Медеу Сәрсекенің «Тендерге түскен келіншек» драмасы, ал 12 мамыр күні ақын, драматург Исрайыл Сапарбайдың «Сыған серенадасы» мюзиклі қойылады, — деді театр директоры.
Баспасөз конференциясынан соң семейліктер Әуезов театрының мұражай қоры ұйымдастырған “Мұхтар Әуезов және ұлттық театр” атты көрмені тамашалады.
Ерекше көрмеге мұражай қорынан 100-ге жуық жәдігер қойылыпты. Заңғар жазушының театр әртістерімен түскен суреттері, «Абай» спектаклін талқылау барысында Шәкен Айманов, Қалибек Қуанышбаевтармен түскен бейнелері өнерсүйер қауымға ұсынылды. Сонымен қатар Әшірәлі Кенжеев пен Әнуар Молдабековтің майлы бояумен салынған портреттері мен КСРО халық әртісі Фарида Шәріпованың киген сахналық киімдері де көрмеге қойылған екен.
Осы күні сағат 17:00-де М.Әуезов атындағы Қазақ ұлттық драма театры «Абайдың жұмбағы» спектаклін семейлік көрермен назарына ұсынды. Қойылымды тамашалап, ұмытылмас әсерге бөленіп шыққан көрермендер ұлттық театр ұжымына ерекше ықыласын білдірді. Қала әкімінің орынбасары Айдар Садырбаев ұлы жазушының есімін алған қазақтың бас театрына — жазушының жерлестері алдында өнер көрсеткен үлкен ұжымға ақжарма алғысы мен жылы лебізін білдірді.
Әлібек КЕМЕЛХАН,
«Семей таңы»
