Семейдегі жылыту маусымына дайындық жұмыстары қала әкімінің жіті назарында тұр. Жылыту маусымының үзіліссіз өтуі дайындық жұмыстарының сапалы жүргізілуіне тікелей байланысты екені белгілі. Жуырда шаһар басшысы Бақытжан Байахметов қазіргі күндері жөндеу жұмыстары жүргізіліп жатқан «Квартал АБ», «Солнечная» және «Дорожник» қазандықтарына барып, жылыту маусымына дайындық және ыстық су беру жұмыстарының барысын тексеріп қайтты.
Шығыс кентінде орналасқан «Квартал АБ» қазандығының жылу желілерінің ұзындығы 4,771 шақырым. Қазандық 54 көп қабатты тұрғын үйді, 11 коммерциялық, 1 әлеуметтік нысанды жылумен қамтамасыз етеді.
Қалалық бюджеттен қазандықты ауыстыруға ақшалай қаражат бөлініп, маусым айының алғашқы күні жөндеу жұмыстары басталған, қыркүйек айында аяқталады деп күтілуде. Сонымен қатар мамыр айының басынан бері қазандықтардың экрандық құбырлары, түтін сорғыштары жөндеуден өткізілуде, электр жабдықтары тексеру, түтін құбырын ауыстыру жұмыстары да жүргізілуде. Аталған жұмыстарды тамыз айында аяқтау жоспарланып отыр.
«Солнечная» қазандығы Шығыс кентіндегі Аюченко көшесінде орналасқан. 2 құбырмен есептелген жылу желілерінің ұзындығы 1,342 шақырым. Қазандық арқылы 12 тұрғын үй және 3 коммерциялық нысан жылумен қамтамасыз етіледі. №1 ст.КВм-1,25-95шп қазандығын КВм-1,45-95шп қазандығына ауыстыруға қалалық бюджеттен ақшалай қаражат бөлініп, жөндеу жұмыстары басталған, қыркүйек айында аяқталуы тиіс.
Мұндағы жөндеу жұмыстары да мамыр айының басында басталған. Қазандықтардың бұрау планкасы тетіктері ауыстырылады, электр жабдықтары тексеріліп, жөнделетін болады, салқындату түтіктері де жөндеуден өтеді, күлді шығару каналы тазаланып, жөнделуде, желілік сорғылардың жұмысы да тексерілуде. Жөндеу жұмыстары алдағы тамыз айының ортасында аяқталады деп күтілуде.
«Дорожник» қазандығы Шымкент көшесінде орналасқан. Жылу желілерінің ұзындығы 5,36 шақырым. Қазандық 21 көп қабатты тұрғын үйге, 6 коммерциялық кәсіпорын мен 1 әлеуметтік нысанға жылу береді. Бүгінгі күні қазандықта газ құбырларын, желілік және түтін сорғыштарды жөндеу, электр жабдықтарын тексеру жұмыстары жүргізілуде. Жөндеу жұмыстарын тамыз айының ортасында аяқталау жоспарланған.
— Жылу көздеріндегі барлық жұмыстар сапалы және белгіленген мерзімде жүргізілуі тиіс. Атқарылып жатқан жұмыстарды бақылау үшін қазандықтарды аралап, тексеруді жалғастыратын боламыз, — деді қала басшысы.
Семей қаласы әкімінің баспасөз қызметі
