Елімізде Ата Заңға енгізілетін өзгертулер мен толықтыруларға қатысты өткізілген республикалық референдумда 8 030 739 азамат бюллетень алды. Бұл туралы ҚР Орталық референдум комиссиясының хатшысы Мұхтар Ерман айтты.
«Орталық референдум комисссиясы астана уақытымен сағат 22.00-де еліміздің барлық өңірінде және 25 шетелдік учаскеде дауыс беру аяқталғанын хабарлады. Облыстардың, республикалық маңызы бар қалалардың және астананың аумақтық комиссиялары ұсынған алдын ала деректері бойынша, азаматтардың референдумға қатысу статистикасы мынадай болды: Ақмола облысы – 73,81, Ақтөбе облысы – 58,06, Алматы облысы – 72,83, Атырау облысы – 67,68, Батыс Қазақстан облысы – 69,37, Жамбыл облысы – 69,59, Қарағанды облысы – 77,39, Қостанай облысы – 72,28, Қызылорда облысы – 79,89, Маңғыстау облысы – 61,19, Павлодар облысы – 75,53, Солтүстік Қазақстан облысы – 75,49, Түркістан облысы – 80,66, Шығыс Қазақстан облысы – 77,49, Нұр-Сұлтан қаласы – 57,06, Алматы қаласы – 33,30, Шымкент қаласы – 72,53 пайыз», — деді Мұхтар Ерман.
Оның айтуынша, еліміздегі референдумға қатысу мүмкіндігі және құқығы бар азаматтардың тізіміне 11 734 642 адам енгізілді. 8 030 739 азамат бюллетень алды. Бұл — дауыс берушілер тізіміндегі азаматтардың 68,44 пайызы.
«Референдум комиссиялары дауыс санауға кірісті. Ертең аумақтық комиссиялар хаттамаларының электронды түрде түсуін күтеміз. Дауыс берудің алдын ала қорытындысы брифингте жарияланады. Оның уақыты қосымша айтылады», — деді Орталық референдум комиссиясының хатшысы.
Ал сарапшылардың бағалауы бойынша, Шығыс Қазақстан учаскелеріндегі дауыс беру процесін бақылау халықтың азаматтық белсенділігінің деңгейі жоғары екенін көрсеткен. Сондай-ақ жауапты органдардың жұмысына оң баға беруге мүмкіндік берді.
Облыстық, республикалық маңызы бар қалалардың, астананың комиссиялары ұсынған деректерге сәйкес, ағымдағы жылдғңы 5 маусымындағы сағат 20.00-дегі жағдай бойынша, бюллетеньдерді тізімге енгізілген азаматтардың жалпы санының 67,65 пайызы алған. Шығыс Қазақстан облысы бойынша бұл көрсеткіш 77,49 пайызды құрады.
Референдум күні шығыста қатты жаңбыр жауып, екпінді жел соқты. Алайда бұл жағдай дауыс берушілердің келуіне әсер еткен жоқ. Таңертеңнен бастап учаскелерде кезектер пайда болды. Шығысқазақстандықтар ұзақ жылдарға бүкіл елдің даму жолын айқындайтын мәселеге белсенді және жауапкершілікпен қарады.
Жалпы, бұл күн саяси институттар мен азаматтық қоғамның жақсы даму деңгейін көрсетті. Күннің бірінші жартысында аға буын өкілдері, ақсақалдар, ардагерлер белсенді дауыс берді. Түске қарай учаскелерде жастар көп болды, адамдар отбасыларымен, қарт ата-аналарымен және балаларымен келді. Осылайша, референдум процесі лакмус сынағы ретінде халықтың бірлігін көрсетті.
Барлық дауыс берушілерге өз пікірін білдіру құқығы берілді. Учаскелерде үкіметтік емес ұйымдардың, түрлі қозғалыстардың өкілдері болды, олар жағдайдың бейресми екендігін, мерекелік атмосфераны және азаматтардың барлық санаттары үшін қолайлы жағдайлар жасалғанын атап өтті. Мәселен, көптеген соғыс ардагерлері, тыл еңбеккерлері, өңірдің қарт тұрғындары үйден дауыс беру құқығына ие бола тұра осындай маңызды саяси оқиғаға қатысу мүмкіндігін жіберіп алмау үшін учаскелерге өздері келді. Учаскелерге келе алмаған азаматтар үйден, әскери бөлімнен, ауруханадан, тіпті перзентханадан шықпай дауыс берді.
Тоқтала кетсек, ШҚО-да барлығы 1027 учаске, оның ішінде 959 ашық және 68 учаске азаматтардың уақытша болу орындарында жұмыс істеді.
Динара НҰРЛЫБЕКҚЫЗЫ,
«Семей таңы»
