5 маусымда Мемлекет басшысы Қасым-Жомарт Тоқаевтың бастамасымен Ата Заңға өзгерістер мен толықтырулар енгізу жөніндегі республикалық референдум өткізіледі. Бұл науқанның маңыздылығын ел болашағына алаңдайтын әр қазақстандықтың дұрыс түсінуі керек.
Елімізде референдум 1995 жылы өткізілді. Содан бері туған ұрпақ референдум дегеннің не екенін білмейді. 27 жылдан
бері Конституциямызға жасалған барлық өзгерістер мен түзетулер тек Парламент арқылы қабылданды. Осы орайда бірнеше
маңызды мәселені атап өткен орынды болар. Біріншіден, осы референдумда Ата Заңымызға енгізілетін өзгерістер Қазақстан
Республикасы Конституциясының 33 бабына, яғни үштен бір бөлігіне қатысты болады. Бұл — үлкен өзгеріс! Ендеше, мұндай
өзгерістің бүкілхалықтық талқылаумен референдум арқылы енгізілуі — дұрыс шешім. Мемлекет басшысы Қасым – Жомарт
Тоқаев өз сөзінде Жаңа Қазақстанның мақсаты, ең алдымен, жалпыұлттық бірлік, ұлттың жаңа сапасын қалыптастыру екенін
айтып өтті.
Суперпрезиденттік биліктің күшті шоғырлануы жағдайында қуатты Парламенттің болуы мүмкін еместігін түсінуіміз керек.
Мемлекет басшысының бұл бастамасы жүйені жетілдірумен және Президентің басқаруындағы артық биліктен кету жолымен
елімізді кең форматты трансформациялауды көздейді. Шын мәнінде, суперпрезиденттік жүйеден кету саяси мәдениеттің дамуына ықпал етіп қана қоймай, сайлау жүйесін демократияландырудағы маңызды қадам болады.
Ендеше, Жаңа Қазақстанды бірге құру жолында жасалып отырған демократияның құралы — референдумнан ешбір
қазақстандық сырт қалмауы керек. Референдумның ойдағыдай өтуі әр қазақстандыққа байланысты. Өйткені бұл жолы
еліміздің әр тұрғыны тікелей ойын білдіру арқылы Конституцияның қабылдануына ықпал етеді.
Шалқар ЖОЛАМАНОВ,
Семейдегі балалар мен жасөспірімдер спорт мектебінің директоры
