Нұрлан Ұранхаев Абай облысының әкімі қызметіне 11 маусым күні тағайындалған болатын. Өткен сенбі күні тура бір апта болды. Облыс басшысы әкім лауазымындағы алғашқы сенбі, жексенбі күндерін қаламен танысудан бастады. Танысудан демекші, Нұрлан Тельманұлы — Семей қаласының өз перзенті. Қызмет бабымен біраз жылдар туған жерден жырақта болғанымен Семейде туып-өскен азаматқа бұл жердің әр бұрышы таныс… Алайда облыс басшысы үшін енді аймақтың тыныс-тіршілігін жетік білу маңызды екені белгілі. Нұрлан Тельманұлы сенбі күні облыс орталығының қыс маусымына дайындығы мен қаладағы халық демалатын саябақтардың жағдайымен танысты. Облыс басшысымен бірге қала әкімі Бақытжан Баяхметов, тағы да басқа қалалық сала жетекшілері болды.
Нұрлан Тельманұлы Мелькомбинат көшесінің бойындағы № 3, 4, 10, 11 үйлердің тұрғындарының бастамашыл тобымен кездесті. Аталған үйлердің тұрғындары аймақ басшысынан жылу мәселесінде көмек сұраған болатын. Тұрып жатқан үйлері ағаштан салынғандықтан, өрт қауіпсіздігі де алаңдататыны белгілі. Бұрын ұн комбинатына қарап келген бұл үйлер кезінде орталық жылу жүйесіне қосулы болған. Ыстық және суық су да болатын. Бұл жерде де қаладағы бүгін келмеске кеткен бұрынғы кәсіпорындардың тағдырын көруге болады… Кезінде зауыт, фабрикалар өз жұмысшыларын тұрғын үймен ғана емес, инфроқұрылымдармен де толық қамтамасыз етіп келгені белгілі. Жасыратыны жоқ, жеке меншік қолына өткен кәсіпорындардың бұрынғы қызметкерлері тұрған үйлердің ешкімге керексіз болып қалғаны жалғыз бұл жерде емес…
Облыс басшысы тұрғындар өтінішін мұқият тыңдап, мәселені шешуге уәде берді:
— Бұл бағытта жұмыс жүргізіліп жатыр. Жобалық құжаттар дайын. Әрине, бәрі бір сәтте шешіле салады деуге болмайды. Рет-ретімен шешімін табады. Жұмысты биыл бастап, аяқтауға тырысамыз. Ең бірінші жылу мәселесінен бастауымыз керек, — деді Нұрлан Ұранхаев.
Облыс басшысы аталған мәселенің шешілуін тиісті сала жетекшілеріне тапсырды. Айтпақшы, тұрғындарға орталық жылу жүйесіне қосылғанша от жағып отырған пештерін бұзбауды, көп жылдар бойы шешімін күтіп тұрған мәселеге байланысты техникалық тұрғыдан проблемалар кездесуі мүмкін екенін де ескертті.
Біздің жақта қыс ұзақ… Семейдегі жылу қазандықтарының да сын көтермейтін жағдайда екендігі белгілі. Нұрлан Ұранхаев бұдан кейін қаладағы ТЭЦ и РК-1 жылу орталықтарында болып, қысқа дайындық жұмысымен танысты. «Теплокоммунэнерго» МКК директоры Азат Сарпеков облыс әкіміне Семейдің қысқа дайындығы жайлы баяндап берді. «Теплокоммунэнерго» басшылығының баяндауынша, мемлекет тарапынан қолдау болғанымен, қиындықтар бар… Солардың бірі — кәсіпорынның несиелік берешегі. Дегенмен қыс маусымына дайындық жүріп жатыр. ЖЭО ағымдағы жөндеу жұмысына 3 млрд теңге, екі жылу қазандығын жөндеуге 2,2 млн көлемінде қаржы бөлінген. Төрт жылу беру көздеріне жөндеу жүргізу жоспарланып отыр. Кәсіпорын өз қаржысына жөндеуге қажетті құралдар сатып алуда.
Осылайша, облыс әкімі Семейдегі қысқа дайындық барысымен танысып шықты. Бұл орайда шешімін күткен проблемаларды өз бақылауына алды. 2022-2023 жылдың қысқа дайындығының ойдағыдай болуын тиісті сала басшыларына тапсырды.
Аймақ басшысы бұдан кейін Семейдің Орталық саябағына бет алды. Қала тұрғындарының сүйікті демалыс орнына қатысты соңғы жылдары шудың көбейіп кеткені белгілі. Бірнеше жыл жөндеуге жабылып, өткен жылы ғана ашылған саябақтың бүгінгі жағдайын керемет деп айтуға келмес… Дегенмен субұрқақ жұмыс істеп тұр. Гүлдер отырғызылған. Нұрлан Тельманұлы саябақтардың тазалығы мен күтіміне, барлық басқа ірі қалалардағыдай, кәсіпкерлерді көмекке шақыру қажеттігін айтты.
— Алматы, Нұр-Сұлтанда мұндай тәжірибе бар. Саябақтардағы жарық пен тазалықтың шығынын кәсіпкерлер көтеру керек. Ал оларға сауда нүктелері мен аттракциондар ашып, өз шығындарын шығарып алуға мүмкіндік жасалады. Келісімшартта бұл орайда екі жақтың міндеттері мен жауапкершіліктері анық көрсетілуі керек, — деді Нұрлан Ұранхаев.
«Семей қаласының тұрғын үй — коммуналдық шаруашылығы» ММ басшысы А.Өтелбаевқа журналистер тарапынан қаланы көгалдандыру, Орталық саябақтағы аяқталмаған жөндеу жұмыстары мен тапсырысты сапасыз орындаған мердігер компаниялар жайлы сауалдар көп болды.
Облыс әкімі Нұрлан Ұранхаев сенбі күнгі қаламен таныстығын Ертіс жағалауында қорытындылады. Журналистер тарапынан берілген барлық сұрақтарға жауап берді.
Жылу, жарық, жол т.б. ағымдағы мәселелермен бірге, жаңа облыстың құрылуына, Абай облысының аудандарына қатысты мәселелерге орай әріптестер тарапынан сауалдар көп қойылды. Облыс басшысы, осы өңірдің тумасы болғандықтан да болар, аймаққа қатысты қойылған сауалдарға аңтарылмай, тыңғылықты жауап берді. Алдағы уақытта аудандармен танысу басталатынын, Көкпекті мен Ақсуат аудандарын бөлу жұмысына байланысты басшы тағайындалатынын да айтып өтті.
Жексенбі күні Нұрлан Уранхаев жұмыс сапарымен М.О.Әуезов атындағы педагогикалық колледжге барды. Білім беру мекемесінің тарихымен танысып, заңғар жазушы Мұхтар Әуезовтің 125 жылдық мерейтойына орай оқу орнының дайындық жұмыстарымен және материалдық-техникалық базасымен танысты. Сондай-ақ «№29 Пальмира» және 17 жалпы білім беретін орта мектептердің жай-күйімен танысты.
Жаңа облыстың жаңа басшысының жұмысы қат-қабат. Шешімін күткен мәселелер көп…
Ерлан АЙҚЫНҰЛЫ,
«Семей таңы»
