Жуырда AMANAT партиясының Шығыс Қазақстан облыстық филиалы жанындағы мемлекеттік басқаруды дамыту және сыбайлас жемқорлыққа қарсы іс-қимыл жөніндегі Қоғамдық кеңестің отырысы өтті.
Жиында Ұлан ауданында 2020-2022 жылдар кезеңінде сыбайлас жемқорлыққа қарсы іс-қимыл бойынша жүргізіліп жатқан жұмыстар туралы мәселе қаралды.
Отырыс барысында партия мүшесі, Ұлан ауданы әкімінің орынбасары Қ.Оқасовтың есебі, Қоғамдық кеңес жұмыс тобының жетекшісі Е.Н. Березинская-Абилова қосымша баяндамасы және ШҚО бойынша ішкі мемлекеттік аудит департаменті басшысының орынбасары Ж. Жұмжуменованың ақпараты тыңдалды.
— 2020-2021 жылдары Ұлан ауданының 68 мемлекеттік мекемесі мен квазимемлекеттік секторында сыбайлас жемқорлық тәуекелдеріне ішкі талдау жүргізіліп, аудан әкімінің ресми сайтында орналастырылды. Ішкі талдау нәтижелері бойынша мемлекеттік мекемелерде сыбайлас жемқорлық тәуекелдері анықталған жоқ. Бекітілген кестеге сәйкес Ағымдағы жылға арналған сыбайлас жемқорлық тәуекелдеріне ішкі талдауды облыс әкімі аппараты биылғы жылдың тамыз айында жүргізеді, — деді өз сөзінде Ұлан ауданы әкімінің орынбасары Қуат Оқасов.
Қоғамдық кеңес жұмыс тобының жүргізген талдауы бойынша ауданда сыбайлас жемқорлықтың алдын алау мақсатындағы іс шаралар өз деңгейінде жүргізілмеген.
— Мониторинг пен талдау сыбайлас жемқорлыққа қарсы іс-қимыл жөніндегі қызметті, сыбайлас жемқорлық тәуекелдерін ішкі талдау, сыбайлас жемқорлыққа қарсы мониторинг жүргізу кезіндегі олқылықтарды, әкімдік және оның ведомстволық бағынысты ұйымдары қызметкерлерінің әдістерін зерделеу, «халық үніне құлақ асатын мемлекет» тұжырымдамасын және сыбайлас жемқорлықтың кез келген көріністеріне нөлдік төзімділік қалыптастыру мақсатында жүргізілді. Сыбайлас жемқорлықты жою бағыты бойынша ауылдық округтерде жұмыстың жүргізілуі әлсіз. Ұлан ауданының Таврия ауылдық округінде мониторинг барысында сыбайлас жемқорлықтың алдын алу бағытындағы жұмыстың жүргізілуінен олқылықтар байқалды, — дейді бұл орайда Қоғамдық кеңес жұмыс тобының жетекшісі Елена Березинская-Абилова.
Кеңес отырысының қорытындысы бойынша ауданның мемлекеттік басқару органдарының басшыларына, мемлекеттік мекемелерде сыбайлас жемқорлық тәуекелдеріне ішкі талдау жүргізу, сыбайлас жемқорлық құқық бұзушылықтар мен қылмыстардың алдын алу бойынша жүйелі жұмыстардың болмауына байланысты кеңес мүшелері тарапынан ескерту жасалып олқылықтардың орнын толтыру бойынша бір ай уақыт берді.
Ерлан АЙҚЫНҰЛЫ,
Семей таңы
