Семейде Абай облысы мәслихатының кезектен тыс, бесінші сессиясы өтті.
Күн тәртібінде 5 мәселе қаралды: Республикалық наградаларды алуға ұсынылған тұлғалардың құжаттарын қарау бойынша облыстық комиссия құрамын қалыптастыру; Ақсуат ауданының шекарасын белгілеу және Көкпекті ауданының шекарасын өзгерту; Абай облысы бойынша «Тексеру комиссиясы» мемлекеттік мекемесінің Ережесін бекіту; Абай облысы әкімдігінің дербес құрамын қалыптастыру; Асыл Өміртаевты «Тексеру комиссиясы» мүшесінің міндетін уақытша атқарушы етіп тағайындау. Облыстық мәслихат депутаттары барлық ұсыныстарды бір ауыздан жақтап дауыс берді. Барлық жобалар «Қазақстан Республикасындағы жергілікті мемлекеттік басқару және өзін-өзі басқару туралы» Заңға сәйкес ұсынылды. Сессияда Абай облысы әкімдігі аппаратының басшысы Жасұлан Сәрсебаев баяндама жасады. Редакциялық комиссия мүшелері болып Альбина Ахметова, Азат Сәрпеков және Серік Байғалиев, есептеу комиссиясының мүшелері болып Қайрат Оспанов, Шолпан Чегедекова және Азат Сәрпеков бекітілді. Абай облыстық мәслихаттың хатшысы Қуаныш Сүлейменов алдағы уақытта сессия отырыстары тек бір тілде – қазақ тілінде өткізілетінін хабарлады. — Бұған дейін сессия отырыстарын екі тілде өткізу туралы ұсыныс түскен болатын. Бірақ бұл мәселені талқылай келе, тек қазақ тілінде өткізетін болып шештік,- деді облыстық мәслихат хатшысы Қуаныш Серікқазыұлы.
Ерлан АЙҚЫНҰЛЫ,
«Семей таңы»
