Өткен жұма, 7 қазан күні Семей қалалық мәслихатының кезектен тыс, 33 сессиясы өтті. Сессияға Абай облысы әкімі Нұрлан Ұранхаев, қалалық мәслихат хатшысы Бейсенбек Ақжалов және қалалық мәслихат депутаттары қатысты.
Сессияның күн тәртібінде Семей қаласының әкімі лауазымына ұсынылатын тұлғаның кандидатурасын және Семей қаласы Қоғамдық кеңесінің құрамын бекіту туралы екі мәселе қаралды.
Абай облысының әкімі Нұрлан Ұранхаев Семей қаласы әкімінің лауазымына Нұрбол Нұрсағатовты ұсынды. Қалалық мәслихат депутаттары Нұрбол Төлегенұлының кандидатурасын бір ауыздан қолдады.
— Құрметті Нұрлан Тельманұлы, қалалық мәслихат депутаттары! Мені Семей қаласы әкімі лауазымына лайық деп танығандарыңыз үшін алғысымды білдіремін. Семей қаласы маған жат емес. Осы уақытқа дейін жинаған барлық білімім мен тәжірибемді облыс орталығының көркеюіне, әлеуметтік-экономикалық жағдайының өркендеуіне, инфрақұрылымын жаңартуға жұмсаймын, — деді Нұрбол Нұрсағатов.
Екінші мәселе бойынша сөз алған қалалық мәслихат хатшысы Бейсенбек Ақжалов Семей қаласының Қоғамдық кеңесінің жаңа мүшелерін мәслихат депутаттарының назарына ұсынды.
— Қоғамдық кеңестің құрамын бекіту туралы мәслихат шешімінің жобасы ҚР «Қоғамдық кеңес туралы» Заңына, ҚР «Қоғамдық кеңес туралы» Заңына үлгілік ережелер енгізу туралы» ҚР Үкіметінің қаулысына және мәслихаттың 2022 жылғы 15 шілдедегі №26 шешіміне сәйкес әзірленді. «Қоғамдық кеңес туралы» үлгілік ереженің негізінде Семей қаласының Қоғамдық кеңесін қалыптастыру үшін конкурстық негізде жұмыс тобы құрылды. ҚР «Қоғамдық кеңестер туралы» Заңының 9-бабына сәйкес, 21 адамнан тұратын Семей қаласы Қоғамдық кеңесі мүшелерінің жаңа құрамын сайлау бойынша конкурс жарияланды,- деді.
Халық қалаулылары Қоғамдық кеңестің жаңа мүшелерін бір ауыздан қолдап дауыс берді.
Сессиядан соң облыс әкімі Нұрлан Ұранхаев жаңадан сайланған Семей қаласының әкімін және облыс әкімінің орынбасарын облыс және аудан активтеріне таныстырады.
— Семей – еліміздің рухани және мәдени орталығы. Тарихы терең шаһарға басшылық ету оңай емес. Жуырда Семейге іссапармен келген Мемлекет басшысы үш жыл ішінде жаңа көпір тұрғызып, халық арасында «жаңа көпір» деген атқа ие болған көпірді күрделі жөндеуден өткізуді тапсырды. Алдымызда Нұрлан Төлегенұлымен бірлесе осы ауқымды жұмыстарды ойдағыдай орындау міндеті тұр. Қаланың әлеуметтік-экономикалық мәселелерін шешуде Нұрлан Төлегенұлының қабілеті жеткілікті деп ойлаймын,- деді облыс әкімі Нұрлан Ұранхаев.
Жиында облыстық ардагерлер кеңесінің төрағасы Мұратқазы Алин мен халықаралық «Қазақ тілі» қоғамының вице-президенті Орал Шәріпбаев сөз алып, жаңа әкімнің қызметіне табыс тіледі.
Жадыра ТӨЛЕГЕНҚЫЗЫ,
«Семей таңы»
