Бірлігі жарасқан Топқайың ауылында да биыл ілкімді істер қолға алынуда. Елді мекенде биыл су жаңа ауылдық клуб бой көтеруде, сондай-ақ жергілікті тұрғындар енді ауыз судың игілігін көреміз деп отыр.
Халықты таза ауыз сумен қамтамасыз етуге арналған мемлекеттік бағдарлама аясында өткен жылдан бастап Топқайыңда ауыз су жүйесі тартылуда. Жалпы құны 600 млн теңгеге жуық қаржыны құрайтын жоба бойынша ауылға ұзындығы 13,9 шақырым су құбырын өткізу көзделген.
Бұл істі өткен жылы «Казконтракшн» мердігерлік ұйымы қолға алған еді. Биыл «Казпрофстрой Холдинг» ЖШС жалғастыруда. Серіктестіктегі учаске бастығы Берік Аманбаевтың айтуынша, бүгінде жалпы су құбыры жолының 12,5 шақырым тартылып болған.
— Ендігі жұмыс — су ұңғымасын қазу керек, су сорғы станциясын салып қойдық. Қазіргі таңда әрқайсысы 200 текше литр суға арналған екі су қоймасын салу қалды. Су құбыры жолының бойында бірнеше құдықтар орнатылды. Жұмыс қарқыны қалыпты, жыл соңына дейін құбырларды толығымен тартып бітіреміз деген ойдамыз, — дейді Берік Аманбаев.
Қазіргі күні бес адам еңбек етуде, техникадан екі экскаватор, бір жүк тиегіш пен манипулятор жұмылдырылған. Жұмысшылар атқарылған жұмыс көлеміне байланысты жалақыларын уақтылы алып отыр.
Катонқарағай ауданының әкімдігі
