Үкімет бақылауындағы ана мен бала өлімінің индикаторлары еліміздің 2025 жылға дейінгі ұлттық даму жоспарының стратегиялық көрсеткіші болып есептеледі. Осы ретте Абай облысының әкімі Нұрлан Ұранхаевтың қатысуымен ана мен бала өлімін төмендету бойынша шұғыл шаралар қабылдау жөніндегі облыстық штабтың алғашқы отырысы өтті.
Штаб отырысынан соң облыс әкімі сала мамандарымен бірге Семей қаласындағы балаларды оңалту, ерте араласу, медициналық-генетикалық кеңес орталығы мен облыстық перинаталдық орталықтың жұмысымен танысты.
3 жастан 18 жасқа дейінгі балаларды қамтитын балаларды оңалту орталығы және 0 жастан 3 жасқа дейінгі бүлдіршіндерге арналған ерте араласу орталығында Семей қаласы, Абай, Аягөз, Бесқарағай, Бородулиха, Жарма, Үржар, Көкпекті аудандары және Курчатов қаласы балаларына 86 қызметкер медициналық көмек көрсетеді. Орталықтарға балаларға қызмет алу үшін күніне 100-ге тарта өтініш түседі.
Ал облыстық перинаталдық орталық жүкті және босанған әйелдерге, жаңа туған нәрестелерге стационарлық және стационарды алмастыратын нысанда мамандандырылған көмек береді. Перинаталдық орталық 220 тәулік бойы пайдалануға арналған және 80 стационарды алмастыратын төсек-орынмен жабдықталған.
Аталған мекемелердің жұмысымен толық танысқан соң облыс әкімі қалалар мен аудандардың әкімдеріне, сондай-ақ сала басшыларына бірқатар міндеттер жүктеді. Атап айтсақ, босанғанға дейінгі жоғары қауіпті жүктілік тобындағы әйел адамдарды пансионатқа жатқызуды және оларды тасымалдауды облыстық деңгейде қамтамасыз ету, босандыру мекемелерінің жас дәрігерлері мен медициналық қызметкерлерін ынталандыру және әлеуметтік қолдау мүмкіндігін қарастыру, денсаулық сақтау және білім басқармаларымен бірлесіп, кадрлар даярлауға арналған гранттарды ұлғайту мүмкіндігін қарастыру, босандыру және балалық шақ қызметтерін медицина қызметкерлерімен жасақтау жөнінде шаралар қабылдауды тапсырды. Сондай-ақ Үржар ауданы мен Ақсуат ауданы ауруханаларының перзентханалық бөлімшесін перинаталдық көмектің ІІ деңгейіне ауыстыру және босану кезінде ауыр жағдайға ұшыраған баласы бар әйелдерді емдеуге жатқызу үшін оңалту төсектерін ұйымдастыру мәселелерін қарастыруды, ультрадыбыстық пренаталды скринингті жүзеге асыратын дәрігерлердің біліктілігін арттыру арқылы жүкті әйелдерді сапалы пренаталды скринингпен қамтуды ұлғайту жөніндегі шараларды қамтамасыз етуді, мекемелерді арнайы мамандармен және медициналық жабдықтармен жарақтандыруды міндеттеді.
Бұдан бөлек облыс әкімі медицина саласы басшыларына экономика және бюджеттік жоспарлау басқармасымен бірлесіп шетелдік және республикалық клиникалардағы басым тақырыптар бойынша медицина қызметкерлерінің біліктілігін арттыруға қосымша қаражат бөлуді қарастыруды ұсынды.
Абай облысының әкімдігі
