7 желтоқсан күні Абай облысының әкімі Нұрлан Ұранхаев фейсбук және инстаграм әлеуметтік желілері арқылы тікелей эфирге шығып, облыс тұрғындарының сауалдарына жауап берді. Тұрғындар Семей қаласын және ауылдарды абаттандыру, жылумен қамту, қатты тұрмыстық қалдықтарды шығару, жолдарды жөндеу, жарықтандыру сынды өзекті мәселелерді қозғады.
Жадыра ТӨЛЕГЕНҚЫЗЫ,
«Семей таңы»
Облыс әкіміне қойылған алғашқы сұрақ мұғалімдерге, дәрігерлерге, мәдениет саласының және мемлекеттік қызметкерлерге, әлеуметтік жағынан аз қамтылған отбасыларға жыл сайын қатты отын сатып алуға берілетін қаражатқа қатысты болды. Тұрғындардың бірі биыл неге аталған көмек көрсетілмей жатқанын сұрады. Аймақ басшысы бұл мәселе шешіліп жатқанын, алдағы уақытта жергілікті бюджеттен қаржы бөлінетінін жеткізді.
ҚР «Ардагерлер туралы» 2020 жылғы 6 мамырдағы Заңына сәйкес, ҰОС ардагерлері және оларға теңестірілген тұлғалар мемлекеттік әлеуметтік жеңілдіктер алуға құқылы. Тұрғындардың бірі бұл көмек қашан берілетін сұрады.
— Бұл мәселе аталған заң аясында шешіледі. Соғыс ардагерлері және оларға теңестірілген тұлғалар, тыл ардагерлері мемлекеттен әлеуметтік жеңілдіктер ала алады. Ешқандай қиындық жоқ. Қазір облысымызда 12 соғыс ардагері бар. Жыл сайын 9 мамырда жәрдемақы беріледі,- деді Нұрлан Ұранхаев.
Қаладағы №12 мектептің мұғалімдері қараша айының жалақысын әлі алмаған. Тұрғындардың бірі облыс әкімінен жағдайды назарға алуын өтінді.
– Менің білуімше, қараша айының жалақысы мұғалімдерге аударылды. Егер олай болмаса, мен бүгін бұл жағдайды тексеруге бұйрық беремін. Қазір облысымызда қаржыландыру жағынан мәселе жоқ. Мүмкін, техникалық ақауларға қатысты орын алған болар, тексереміз, – деді аймақ басшысы.
Водный кенті әлі күнге орталықтандырылған сумен қамтамасыз етілмеген. Кент тұрғындары аталған мәселені бірнеше жылдан бері көтеріп келеді.
— Восход және Водный кенттерін сумен қамтамасыз ету мақсатында биыл Семей қаласының құрылыс бөлімі «Леонстройсервис» ЖШС-мен шарт жасасты. Жұмысты 2023 жылы аяқтау көзделіп отыр. Келесі жылы бұл мәселе шешілетін болады,- деді Н.Ұранхаев.
Ақсуат ауданының тұрғыны өңірге «Qazaq Oil» компаниясының жанармай құю станциясын салып беруді өтінді.
— Бұл мәселе былтыр жаз маусымында туындаған. Қазір Ақсуат ауданында 8 жанар-жағармай құю станциясы жұмыс істеп тұр. Инвесторлар Ақсуат ауданында ЖҚС ашуға мүдделі болған жағдайда, облыс әкімдігі көмек көрсетуге дайын,- деді Н.Ұранхаев.
Көкпекті ауданының тұрғыны ауданда балалар ойын алаңдары жетіспейтінін, жолдар жөндеуді қажет ететінін айтты.
— Көкпекті ауданының әкімі Ділдәбек Тәжібайұлы — өте тәжірибелі басшы. Айтылған барлық мәселелерді шешеді деп ойлаймын. 2025 жылға дейін ауданда төрт балалар ойын алаңын салу көзделген, қосымша тағы төрт ойын алаңы пайдалануға беріледі. Жолдарға келсек, 20 көшенің жолын орташа жөндеуден өткізуге бюджеттен 500 млн теңге қаржы қарастырылған,- деді Нұрлан Тельманұлы.
— Шығыс кентіндегі 5 саяжайда кешкі сағат бес-алтыға дейін жарық болмайды. Жөндеу жұмыстары неге жазда жүргізілмейді. Күндіз от жаға алмай отырмыз,- деп сұрақ қойды саяжай тұрғындарының бірі.
— Шығыс кентінде электр желілері тозған. Желілер толық қуаттылықта жұмыс істегенде қысымды көтермей қалады. Сондықтан техникалық ақаулар орын алуда. Қазір тиісті жұмыстар басталды. Он күн ішінде аяқталуы тиіс,- деді аймақ басшысы.
Облыс әкімі қаланың оң жағалауын жылумен қамту мәселесі де кезең-кезеңімен шешіліп жатқанын жеткізді. Ал сол жағалауда жылу жеткілікті, тіпті артықшылық та бар.
– Облыс орталығының ең күрделі мәселелерінің бірі – жылумен қамту мен қоғамдық көліктердің жетіспеушілігі. Қазір «Орталық» және «Ғаббавов» жылу қазандықтарына жөндеу жұмыстары жүргізілуде, сонымен қатар «103», «103А», «35-квартал» мен «зооветинститут» қазандығының жобалық-сметалық құжаттары әзірленуде. Бұл қосымша жылу береді. Жылумен қамтамасыз ету тез арада шешілетін мәселе емес, бірақ ауыр апаттарды болдырмау үшін жұмыс істеп жатырмыз. Қаржы жағынан еш қиындық жоқ, бәрі жылу желілерінің техникалық жағдайына байланысты, — деді Нұрлан Ұранхаев.
Аймақ басшысы сондай-ақ «Абай жастары» тұрғын үй бағдарламасы туралы жан-жақты айтып берді.
— Бұл — басқа облыстарда да жүзеге асырылып жатқан типтік бағдарлама. Ауыл жастарының қатысуына келсек, бағдарламаны облыстың басқа қалалары мен аудандарында да қолданысқа енгізу жоспарланып отыр, – деді облыс әкімі.
Нұрлан Ұранхаев Молдағалиев пен Жамбыл көшелерінің бойындағы үйлердің сүрілуі жайлы да айтып өтті.
– Біздің облысқа қатысты Мемлекет басшысының тапсырмасы бар. Соның бірі – қаланы дамытудың бас жоспарын әзірлеу. Біз бұл мәселемен айналысып жатырмыз. Аталған көшелердің бойына жаңа жағалау, 1200 орындық мектеп, Мұз сарайы, Конгресс-холл салынады. Ақша тұрғындардың барлығына төленеді,- деді Н. Уранхаев.
Нұрлан Тельманұлы жолаушылар тасымалына қатысты тұрғындардың шағымдарына жауап берді.
— Иә, біз барлығын көріп, естіп отырмыз. Қалада автобустар бар, бірақ жүргізушілер жетіспейді және жалақыларына қатысты мәселелер туындап отыр. Біз оларды шешуге тырысамыз. Бір автопаркке 30 автобус сатып алу жоспарлануда, келесі жылы басқа автопарк тағы 40 автобус алады,- деді облыс әкімі.
Бүгінгі күні облыс орталығында қоқыс шығару мәселесі өте өзекті.
— Қоқыс мәселесі менің бақылауда. Мен де осы қаланың тұрғынымын. Маған да үнемі жақындарым, таныстарым шағымдарын айтады. Қалада жаңа жылдан бастап қоқыс шығару жүйесі басқаша жұмыс істейтін болады. Қала 11 секторға бөлініп, әрқайсысы бойынша өзінің қоқыс шығаратын компаниясы жұмыс істейді,- деді облыс әкімі.
Сондай-ақ аймақ басшысы қаңғыбас иттер мен мысықтарға арналған баспана салу туралы да айтып өтті. Нұрлан Тельманұлының айтуынша, құрылысқа қаражат 2023 жылы іздестірілетін болады.
Аймақ басышысы 45 минуттың ішінде 33 сұраққа жауап берді. WhatsApp желісіне келіп түскен сұрақтарға алдағы уақытты жауап қайтарылатын болады.
Айта кетейік, осындай кездесулерді тұрақты түрде өткізу жоспарда бар. Келесі аптада әкім орынбасары Димитрий Гариков тікелей эфирге шығатын болады.
