ИНВЕСТИЦИЯЛЫҚ ЖОБАЛАРҒА БАСЫМДЫҚ БЕРІЛЕДІ
Абай облысы өңірлік коммуникациялар қызметінде Кәсіпкерлік және индустриялық-инновациялық даму басқармасының басшысы Рүстем Ворошиловтың қатысуымен облыстағы өнеркәсіп саласының дамуы туралы брифинг өтті.
Зарина КӘП
«Семей таңы»
Басқарма басшысының айтуынша, өткен жылы қала өнеркәсібінде үлкен өсім байқалған.
– Өткен жылдың 12 айының қорытындысы бойынша, саланың өсу қарқыны 1,1 триллион теңгені құрады. 2021 жылы бұл көрсеткіш небәрі 910 млрд теңгені құраған еді. Облыс өнеркәсібінің негізгі салалары — тау-кен өндіру және өңдеу өнеркәсібі, оның ішінде машина жасау, металлургия өнеркәсібі, металл емес минералды өнімдерді, сондай-ақ тамақ өнімдерін өндіру. Аймақта жалпы саны 67 ірі және орта кәсіпорын жұмыс істейді Өнеркәсіпте бірнеше бағыт болса, еліміз бойынша және біздің облыста өңдеу өнеркәсібі саласы негізгі болып табылады. Оның көлемі өткен жылы 454,2 млрд теңгені құрады. Бұл ретте біздің облыс өнеркәсіптің, оның ішінде өңдеу өнеркәсібінің локомотиві болып табылады. 2022 жылдың желтоқсанында ArxMinerals жобасының бірінші кезеңі іске қосылды. Бұл біздің өңірдегі жер қойнауын пайдалану саласындағы ірі кәсіпорын,- деп атап өтті Рүстем Ворошилов .
Басқарма басшысының айтуынша, өнеркәсіп саласы 25 жылдай тоқырауда болған Семей қаласында алдағы уақытта ірілі – ұсақты кәсіпорындар ашылмақ. Ал жұмыс істеп тұрған өнеркәсіп орындары өндіріс көлемін арттыратын болады.
2025 жылы Семейде жаңа ет комбинаты іске қосылмақ. Бұл ірі жоба, экспорттан бөлек, ішкі нарықты да етпен қамтамасыз етуге мүмкіндік береді. Жаңа комбинатта ірі қара мал мен жылқы, қой етін өндіру жоспарланған. Құны 18 миллиард теңгені құрайтын жоба аясында 200-ден астам жұмыс орны ашылмақ. Заманауи — вакуумдық қаптамада шығарылатын өнімді тұтынушы кез келген көлемде сатып ала алады. Кәсіпорында мал союдан бастап экспортқа дейін толық өңдеу процесі жүргізіледі.
– Біздің негізгі мақсатымыз – инвестициялық жобаларды жүзеге асыру. Семей қаласының аумағында «Өндіріс» индустриялы аймағы бар. Мұндай аймақтарда экономиканың басым секторлары — өңдеуші кәсіпорындар құрылады. Мұндай секторлар ұлттық жобалар аясында субсидиялау арқылы қаржыландырылады. Осылайша, инвесторлар тарту үшін жаңа кәсіпорындар құру міндетін алға қойып отырмыз. Мәселен, қараша айында облыс әкімі меморандумдарға қол қою үшін форумға барды. Осылайша, біз инвесторларды тартуға тырысамыз,- деді Рүстем Ворошилов.
Басқарма басшысы машина жасау саласына да айрықша көңіл бөлінетіндігін атап өтті.
— Қазір «Семмаш» зауытымен бірлесіп бірқатар жұмыстар жүргізілуде. Мәселен, жалақы мәселесі шешілді. Кез келген өнеркәсіптік өндіріс энергияны көп қажет ететінін айтқым келеді. Қазір бос тұрған үй-жайлардың иелерін анықтау үшін скрининг жүргізіп жатырмыз. Болашақта жұмысы тоқтап тұрған кәсіпорындарды шағын индустриялық парктерге айналдыру жоспарымызда бар. Шағын индустриялық парк — бұл инфрақұрылымы бар дайын ғимарат. Оның аумағы жеке учаскелерге бөлінеді. Басты артықшылығы – жер телімдерін нарық бағасынан төмен бағаға жалға алуға болады. Негізгі мақсатымыз – өнім көлемін арттырып, отандық өндірісті дамыту,– деді басқарма басшысы.
