Биыл облыста егіс алқабы өткен жылмен салыстырғанда 1,2 мың гектарға артқан. Бұл туралы өңірлік коммуникациялар қызметінде Абай облысы Ауыл шаруашылығы және жер қатынастары басқармасының басшысы Анзор Абаевтың қатысуымен өткен баспасөз мәслихатында айтылды.
Зарина КӘП,
«Семей таңы»
Баспасөз мәслихатында Ауыл шаруашылығы және жер қатынастары басқармасы басшысы көктемгі егіс науқанына дайындық барысы туралы айтты. Анзор Абаевтың айтуынша, биыл егіс алқабының жалпы көлемі 743,6 мың гектарды құрайды, бұл 2022 жылғы деңгейден 1,2 мың гектарға артық. Күнбағыс сияқты әлеуметтік маңызы бар дақылдар егілетін алқапты 12,4 мың гектарға, ал мал азығы дақылдары алқабын 4,5 мың гектарға ұлғайту жоспарлануда.
— Күнбағыс — ең қажетті дақылдардың бірі. Сонымен қатар шаруашылықтарда дақылдарды алмастыру жүргізіледі. Дәнді-бұршақты дақылдар егістігі 15,1 мың гектарға қысқарады деп болжануда. Ал көкөніс, бақша дақылдары мен картоп алқаптары да ұлғайтылып, 0,08 мың гектарға егіледі деп жоспарлануда. Облыста 4 тұқым өсіру және бір элиталық тұқым өсіру шаруашылықтары шаруа қожалықтарын ауыл шаруашылығы дақылдарының аудандастырылған сорттарының тұқымдарымен қамтамасыз етеді,- деді басқарма басшысы.
Қазіргі уақытта тұқымдық материалды тексеру жұмыстары жүргізілуде. Сорттарды жаңарту және тұқымдық материалды ауыстыру мақсатында шаруашылықтар жоғары репродукциялы тұқымдарды сатып алады.
— Биыл тұқым шаруашылығын дамытуды субсидиялауға 790,0 млн теңге, популяциясы зиянды және аса қауіпті зиянкестерді өңдеуге арналған пестицидтердің, биоагенттердің құнын субсидиялауға 790,0 млн теңге, популяциясы зияндылықтың экономикалық шегінен асатын және карантиндік объектілерге 529 млн теңге, ауыл шаруашылығы тауарын өндірушілерге су жеткізу бойынша қызметтердің құнын субсидиялауға 135,6 млн теңге, пестицидтерді залалсыздандыруға 1,3 млн теңге, ауыл шаруашылығы дақылдарының зиянкестерімен күресу шараларына 4,9 млн теңге, органикалық өнімдерді қоспағанда, тыңайтқыштар құнын субсидиялауға 653,0 млн теңге қарастырылған,- деді Анзор Абаев.
Егіс науқанын техникамен қамтамасыз ету үшін тракторлар, топырақ өңдеу және егіс техникалары бар. Сонымен қатар шынжыр табанды және дөңгелекті 12 900 көлік дайындалған. Жөндеу және дайындық жұмыстары жалғасуда. Облыс бойынша дала жұмыстарына Павлодар мұнай өңдеу зауытынан 19,3 мың тонна дизель отыны бөлінген. Операторлардың шығындары ескеріле отырып, облыс бойынша ауыл шаруашылығы тауарын өндірушілер үшін орташа баға литріне 207-210 теңгені құрайды. Бүгінгі таңда аудандарға 1,6 мың тоннаға жуық жанармай жөнелтілген.
– Биыл «Кең дала» бағдарламасы бойынша көктемгі науқанды қаржыландыруға 1,3 млрд теңге қарастырылған. Бүгінгі таңда 579,6 миллион теңгеден астам сомаға 25 өтінім мақұлданды,— деп түйіндеді сөзін Анзор Абаев.
