Биыл Абай облысында 4 522 оқушы мектеппен қоштасқалы отыр. Оның ішінде 179 түлек — «Алтын белгі» белгіге үміткер. Бұл туралы өңірлік коммуникациялар қызметінде Абай облысы Білім басқармасы басшысы Нұржан Ахметқалиевтың қатысуымен өткен баспасөз мәслихатында айтылды.
Ерзат ЖЕТІБАЕВ,
«Semeı tańy»
Биыл оқушылардың жазғы демалысына өзгеріс енгізілгені белгілі, яғни мектептегі сабақтар 31 мамырда аяқталады. Мектеп түлектері үшін соңғы қоңырау 1 маусымда соғылады.
Ұлттық бірыңғай тестілеуді тапсыруға 4 034 (87 пайыз) түлек өтініш берген.
Басқарма басшысы оқушылардың жазғы демалысын ұйымдастыру жайына да тоқталды.
Білім басқармасы тарапынан жазғы каникул кезеңінде балалардың сауықтыру демалысын, бос уақытын және жұмыспен айналысуын ұйымдастыру жөніндегі бұйрық; іс-шаралар жоспары, тұжырымдамасы, сондай-ақ күнтізбелік-тақырыптық іс-шаралар қамтылған балаларды бос уақытында жұмыспен қамту картасы дайындалған.
Жазғы демалыс уақытында балалар мен жасөспірімдердің толық тынығуына, олардың шығармашылық және қоғамдық белсенділігін арттыруға, денсаулығын нығайтуға жағдай жасау мақсатында облыста демалыс лагерьлері мен мектеп жанындағы сауықтыру алаңдары ұйымдастырылады.
— Жазғы демалысты ұйымдастыруда үш негізгі бағыт анықталды: сауықтыру лагерлерін ұйымдастыру; балаларды (мектеп жанындағы лагерьлер, қосымша білім беру ұйымдары), оның ішінде жекелеген санаттағы балаларды жазғы іс-шаралармен қамту; балалардың қауіпсіздігін қамтамасыз ету. Бұл ретте облыс бойынша санитариялық-эпидемиологиялық бақылау, төтенше жағдай, полиция, денсаулық сақтау және қоғамдық ұйымдар департаменттерінің өкілдерінен тұратын облыстық, қалалық және аудандық ведомствоаралық комиссиялар құрылған,- деді басқарма басшысы.
Бүгінде Абай облысы бойынша балаларға арналған 12 сауықтыру лагері бар, оның 9-ы — мемлекеттік, 3-уі — жекеменшік. 7 лагерь Семей қаласының аумағында орналасса, 5-уі ауылдық жерлерде, қалған 2-уі мектептер жанынан ашылған. Балалар лагері жоқ Аягөз, Ақсуат, Бесқарағай және Көкпекті аудандарындағы әлеуметтік осал санаттағы отбасылардың балалары облыстың басқа аудандары мен қалаларындағы лагерьлерде демалатын болады.
— Барлық жаздық лагерьлерде жөндеу жұмыстарын жүргізу, сумен жабдықтау жүйесімен қамтамасыз ету, өртке қарсы қауіпсіздік, аумақты абаттандыру және лагерьлер қызметін ұйымдастыру бойынша басқа да іс-шаралар пысықталуда. Жалпы, жазғы сауықтыру лагерьлерінің балаларды қабылдауға дайындық деңгейі қанағаттанарлық деуге болады. Арнайы педагогтер, колледждер мен жоғары оқу орындарының студенттерінен лагерь қызметкерлерінің штаты жасақталуда,- деді Білім басқармасы басшысы Нұржан Ахметқалиев.
Бүгінгі таңда жас ұрпақты еңбекке баулу, болашақ мамандығын дұрыс таңдауға бағыт-бағдар беру өте маңызды.
— Ауыл мектептері шаруа қожалықтарымен ынтымақтастық жөніндегі жұмысты жалғастырады. Еңбек заңнамасына сәйкес, ата-аналарының келісімі бойынша, жас ерекшелігі және уақыт шектеулері ескеріле отырып, оқушылар келісімшарт негізінде егін егу және егін жинау науқанында өз қалаулары бойынша жұмысқа тартылатын болады,- деді басқарма басшысы.
Балалар туризмі аясында оқушылар республиканың киелі жерлер географиясына енген тарихи орындарға, өңіріміз бен еліміздің көрікті жерлеріне барады.
920 оқушыны (олимпиадалардың, ғылыми жобалардың, түрлі конкурстардың, жарыстардың жеңімпаздары, әлеуметтік осал санаттағы балалар) «Қазақстан халқына» қайырымдылық қоры есебінен «Үржарайым» (Үржар ауданы) және «Айналайын» (Алматы қ.) лагерьлеріне жіберу жоспарланып отыр.
Баспасөз мәслихатының соңында Білім басқармасы басшысы БАҚ өкілдерінің ҰБТ-ға қатысты қойған сұрақтарына жауап берді.
ҰБТ өтіп жатқан орындарда, қажет болған жағдайда, тест тапсырушыларға психологиялық тұрғыда көмек көрсету үшін арнайы психологтер кезекпен жұмыс істейтін болады.
— Биылғы түлектердің ішінде шет елдерде, оның ішінде Ресейдің оқу орындарында білім алуға ниетті оқушылар саны азайған. Сондай-ақ жылдан-жылға ҰБТ-ны ұйымдастыру кезінде ашықтықты, әділдікті қамтамасыз ету, жемқорлықтың алдын алу мақсатында бақылау күшейтіліп келеді. Әзірге тест тапсырушылар тарапынан шағымдар болған жоқ,- деді Нұржан Ахметқалиев.
