11 шілде күні ақын, ұлы ойшыл, аудармашы, философ Шәкәрім Құдайбердіұлының туғанына 165 жыл толды. Осыған орай, Семей қаласының орталық саябағындағы Шәкәрім ескерткішіне гүл шоқтары қойылып, ақын рухына тағзым жасалды.
Жиынға облыс әкімі Нұрлан Ұранхаев, зиялы қауым өкілдері, қала тұрғындары, жастар, әр саланың өкілдері, ақынның ұрпақтары да қатысты. Ақынның мерейтойына орай Алматы қаласының Талғар ауданынан Шәкәрімнің Айғаншадан туған ұлы Зияттың немересі Нұрлан Мерекеұлы отбасымен, сондай-ақ Алматы қаласының Панфилов ауданынан, Астана, Павлодар, Теміртау, Екібастұз қалаларынан ұрпақтары арнайы келді.
Мерекелік іс-шараның мақсаты ақынның ұрпақтарын ата қонысымен, Шәкәрім қажының өмірі өткен тарихи орындармен таныстыру, ақынның шығармашылығын, өмір жолын насихаттау.
— Адамдық борышың –
Халқыңа еңбек қыл.
Ақ жолдан айнымай,
Ар сақта, оны бiл, –
деп жырлаған Шәкәрім бабамыздың өлеңдері – гуманизмнің темірқазығы. Абай елі ұлы бабаларын әрдайым ұлықтап келеді. Шәкәрім Құдайбердіұлының 165 жылдығы да өнегелі істермен өрнектелуі керек деп ойлаймыз, — деді облыс әкімі Нұрлан Ұранхаев.
Ақынның еңбегі мен шығармашылығын зерттеу, есімін мәңгі есте қалдыру бүгінгі ұрпақтың қолында. Шәкәрім мұрасы — ұрпаққа аманат.
— Шәкәрім атамыздың 165 жылдық мерейтойына Алматы облысынан бір топ ұрпақтары келдік. Ұлы ақынның шөбересімін. Шәкәрім атамыздың мерейтойы кең ауқымда аталып өтіп жатқанына қуаныштымыз. Зұлмат заманда өмір сүрген ұлы тұлғаларымыз елден кетуге мәжбүр болды. Дегенмен де олардың қалдырған мол мұрасы, туындылары халқымыздың игілігіне жарап отыр, — деп атап өтті ақынның шөбересі Нұрлан Зиятов.
Іс-шара «Шәкәрім жүрген ізбенен…» керуенімен Абай ауданында жалғасын тапты. Еліміздің әр өңірінен келген ақын ұрпақтары керуенмен Абай ауданына аттанды.
Облысқа арнайы келген мерейтой қонақтары мен ақын ұрпақтары, зиялы қауым өкілдері Қарауыл ауылындағы Шәкәрім Құдайбердіұлының ескерткішіне тағзым етіп, гүл шоқтарын қойды.
Одан кейін Жидебайдағы Абай — Шәкәрім мемориалдық кешеніне барып, бабалар рухына Құран бағыштап, зиярат етті. Келесі кезекте алыс-жақыннан жиналған қонақтар «Қаламқас» ән-би ансамблінің әдеби-сазды қойылымын тамашалады.
Сондай-ақ Жидебайдағы амфитеатрда ұйымдастырылған «Шәкәрім баба өсиеті» тақырыбындағы облыстық жазба ақындар мүшәйрасына куә болып, жеңімпаздарды марапаттау рәсіміне қатысты.
Шәкәрім ұрпақтары Абайдың музей-үйі мен «Шәкәрімнің саят қорасы» музейінде болды, Қарауыл ауылындағы М.Әуезов атындағы орталықтандырылған кітапханада ұйымдастырылған «Шежірелі Шәкәрім» атты кітап көрмесімен танысты.
Күн соңында мерейтой қонақтары Қарауыл ауылындағы Абай алаңында өткен «Кетермін, артымда сөз, әнім қалар…» атты мерекелік концертті тамашалады.
Айта кетейік, мерейтойды өткізу жөнінде облыстық іс-шаралар жоспары бекітілген болатын. Жыл басынан бері 100-ге жуық түрлі іс-шара ұйымдастырылды.
Биыл «Абай жолы» кітаптар сериясымен ақынның орыс тіліндегі өлеңдер жинағы шығарылады. Шәкәрім атындағы университеттің бастамасымен ғылыми-тәжірибелік конференция өтеді.
Абай облысы әкімдігі
